Qazaqstandyqtar Tuńǵysh Prezident Nursultan Nazarbaevtyń Táýelsiz Qazaqstannyń qalyptasýyna qosqan úlesin Konstitýtsiiada bekitýdi usynýda. Bul týraly memlekettik biliktiń tarmaqtary arasynda ókilettikterdi qaita bólý máseleleri jónindegi jumys tobynyń úshinshi otyrysynan keiin Qazaq gýmanitarlyq zań ýniversiteti Azamattyq-quqyqtyq zertteýler ǵylymi-zertteý institýtynyń direktory Tólesh Qaýdyrov aitty, dep habarlaidy QazAqparat.
«Konstitýtsiialyq reformanyń ózi qoǵam arasynda zor silkinis týdyrdy. Komissiia óz usynysyn jibergen azamattardyń barlyǵyna rizashylyǵyn bildiredi. Reforma basqa da jolmen júrgizilip jatqandyǵyn este ustaý mańyzdy. Bul tek qana konstitýtsiialyq ózgerister ǵana emes. Biz 45-ten 39 ókilettikti úkimet pen Parlamentke beretindigin sanap shyqtyq. Óz erkimen 39 ókilettikti esh qiyndyqsyz atqarýshy bilikke bere salý álemdik oqiǵa ekendigin atap ótkim keledi. Jumys júrip jatyr, zań jobasy ázirlenýde. Ol aidyń sońyna deiin Parlamentke engizilýi tiis», - dedi Qaýdyrov.
Onyń aitýynsha, el azamattarynan kelip túsken usynystar san alýan.
«Tuńǵyshy Prezident Nursultan Nazarbaevtyń rólin Konstitýtsiia mátininde bekitý týraly da usynys boldy. Tipti, ol ókilettikteriniń basym kópshiligin berip otyrǵan joq pa degen alańdaýshylyq ta boldy. Usynystar sailaýdan bastap biliktiń joǵary tarmaqtary ókilettikterine deiingi bizdiń qoǵamdyq-saiasi ómirimiziń san alýan bólikterin qamtidy», - dedi ol.
Onyń sózine qaraǵanda, zań jobasyna qatysty sheshim áli qabyldanǵan joq.
«Ol ázirleý jáne talqylaý satysynda tur. Bul zań jobasyn jaqsarta túsetin barynsha qundy usynystar mindetti túrde eskeriledi», - dedi Tólesh Qaýdyrov.
Aita keteiik, buǵan deiin saiasi reformalar jónindegi jumys tobyna 500-den astam usynys túskenin habarlaǵan bolatynbyz.
.jpeg)