Elbasynyń baspasóz hatshysy Aidos Úkibai el ishinde Nursultan Nazarbaevtyń densaýlyq jaǵdaiyna qatysty taraǵan qaýesetti joqqa shyǵardy, dep habarlaidy "Ult aqparat".
«Keshe Qaýipsizdik Keńesiniń tóraǵasy Nursultan Nazarbaev birqatar óńir ákimderimen telefon arqyly sóilesti. Osy oraida birinshi kezekte, tótenshe jaǵdai kezinde halyqtyń qaýipsizdigin qamtamasyz etýdiń ózekti máseleleriniń talqylanýy qalypty jaǵdai. Qatań karantindik talaptar aiasynda Elbasynyń jumys kabinetine kirý turǵysynda da shekteý bar ekenin túsiný kerek. Alaida shekteýge qaramastan, baspasóz qyzmeti Tuńǵysh Prezidenttiń qyzmeti týraly halyqty der kezinde aqparattandyrýǵa tyrysýda», - dedi Aidos Úkibai.
Osy oraida ol baspasóz qyzmeti buǵan deiin taraǵan qaýesetterge sholý jasap, olarǵa qatysty pikir bildirmegenin atap ótti.
«Degenmen sońǵy kezderi jekelegen adamdar eldegi jaǵdaidy turaqsyzdandyrý boiynsha belsendi áreketter jasaýda. Onyń ishinde Elbasynyń densaýlyǵyna qatysty shyndyqqa janaspaityn qaýeset taratýǵa tyrysýda. Osynyń barlyǵy - arandatý men jalǵan aqparat», - dep atap ótti baspasóz hatshysy.
Osy oraida A. Úkibai Tuńǵysh Prezidenttiń densaýlyq jaǵdaiy jaqsy ekenin, sonymen qatar Elbasy Otan igiligi úshin karantin kezinde de jumys jalǵastyryp jatqanyn qadap aitty.
«Eger de bireýdiń kúmáni bolsa, keshe Elbasy sóilesken ákimderdiń kez kelgeninen surasyn. Engizilgen shekteýlerdiń barlyǵy toqtaǵan kezde, Tuńǵysh Prezidenttiń qatysýymen ótken jumys kezdesýleri nemese keńesterden videojazbany jeke ózim jasaýǵa ýáde etemin», - dedi Aidos Úkibai.
Budan buryn habarlanǵandai, Elbasy óńir ákimderimen halyqtyń qaýipsizdigin qamtamasyz etý daiyndyǵyn talqylady.
