ەلباسىنىڭ باسپاسٶز حاتشىسى ايدوس ٷكٸباي ەل ٸشٸندە نۇرسۇلتان نازارباەۆتىڭ دەنساۋلىق جاعدايىنا قاتىستى تاراعان قاۋەسەتتٸ جوققا شىعاردى, دەپ حابارلايدى "ۇلت اقپارات".
«كەشە قاۋٸپسٸزدٸك كەڭەسٸنٸڭ تٶراعاسى نۇرسۇلتان نازارباەۆ بٸرقاتار ٶڭٸر ەكٸمدەرٸمەن تەلەفون ارقىلى سٶيلەستٸ. وسى ورايدا بٸرٸنشٸ كەزەكتە, تٶتەنشە جاعداي كەزٸندە حالىقتىڭ قاۋٸپسٸزدٸگٸن قامتاماسىز ەتۋدٸڭ ٶزەكتٸ مەسەلەلەرٸنٸڭ تالقىلانۋى قالىپتى جاعداي. قاتاڭ كارانتيندٸك تالاپتار اياسىندا ەلباسىنىڭ جۇمىس كابينەتٸنە كٸرۋ تۇرعىسىندا دا شەكتەۋ بار ەكەنٸن تٷسٸنۋ كەرەك. الايدا شەكتەۋگە قاراماستان, باسپاسٶز قىزمەتٸ تۇڭعىش پرەزيدەنتتٸڭ قىزمەتٸ تۋرالى حالىقتى دەر كەزٸندە اقپاراتتاندىرۋعا تىرىسۋدا», - دەدٸ ايدوس ٷكٸباي.
وسى ورايدا ول باسپاسٶز قىزمەتٸ بۇعان دەيٸن تاراعان قاۋەسەتتەرگە شولۋ جاساپ, ولارعا قاتىستى پٸكٸر بٸلدٸرمەگەنٸن اتاپ ٶتتٸ.
«دەگەنمەن سوڭعى كەزدەرٸ جەكەلەگەن ادامدار ەلدەگٸ جاعدايدى تۇراقسىزداندىرۋ بويىنشا بەلسەندٸ ەرەكەتتەر جاساۋدا. ونىڭ ٸشٸندە ەلباسىنىڭ دەنساۋلىعىنا قاتىستى شىندىققا جاناسپايتىن قاۋەسەت تاراتۋعا تىرىسۋدا. وسىنىڭ بارلىعى - ارانداتۋ مەن جالعان اقپارات», - دەپ اتاپ ٶتتٸ باسپاسٶز حاتشىسى.
وسى ورايدا ا. ٷكٸباي تۇڭعىش پرەزيدەنتتٸڭ دەنساۋلىق جاعدايى جاقسى ەكەنٸن, سونىمەن قاتار ەلباسى وتان يگٸلٸگٸ ٷشٸن كارانتين كەزٸندە دە جۇمىس جالعاستىرىپ جاتقانىن قاداپ ايتتى.
«ەگەر دە بٸرەۋدٸڭ كٷمەنٸ بولسا, كەشە ەلباسى سٶيلەسكەن ەكٸمدەردٸڭ كەز كەلگەنٸنەن سۇراسىن. ەنگٸزٸلگەن شەكتەۋلەردٸڭ بارلىعى توقتاعان كەزدە, تۇڭعىش پرەزيدەنتتٸڭ قاتىسۋىمەن ٶتكەن جۇمىس كەزدەسۋلەرٸ نەمەسە كەڭەستەردەن ۆيدەوجازبانى جەكە ٶزٸم جاساۋعا ۋەدە ەتەمٸن», - دەدٸ ايدوس ٷكٸباي.
بۇدان بۇرىن حابارلانعانداي, ەلباسى ٶڭٸر ەكٸمدەرٸمەن حالىقتىڭ قاۋٸپسٸزدٸگٸن قامتاماسىز ەتۋ دايىندىعىن تالقىلادى.
