QR Tuńǵysh Prezidenti Túrkistandaǵy «Kerýen-Sarai» týristik kesheniniń jumysymen tanysty, dep habarlaidy "Ult aqparat".
«Elbasy «Kerýen-Sarai» belgili týristik kesheniniń jumysymen tanysty. Nursultan Nazarbaev «Altyn Samuryq» Ushatyn teatrǵa baryp, «Qyz qýý» jáne sý ústindegi teatrlandyrylǵan shoýdy tamashalady», - dep málim etti Elbasynyń baspasóz hatshysy Aidos Úkibai.
Bir shaqyrymǵa sozylǵan keshende tórt myń adam jumys isteidi. Jobaǵa salynǵan investitsiia kólemi – 87 mlrd teńge. Erekshe stilde salynǵan nysan Uly Jibek jolyndaǵy saýdany elestedi. Munda qonaq úiler, meiramhanalar, fýd-kordtar, shyǵys bazary, qolónershiler kóshesi sekildi saýda jáne oiyn-saýyq ortalyqtary bar. Keshen ishindegi saýda nysandary men oiyn-saýyq ortalyqtaryn sý arnasy biriktiredi. Qaiyqqa otyryp kez kelgenine júzip barýǵa bolady. Sondyqtan «Kerýen-Saraidy» «Qazaqstandaǵy Venetsiia» dep ataidy.
Alyp keshenniń jobasyn «Turkistan Tourism City» kompaniiasy iske asyrǵan. Keshen qurylysy 2019 jyly jeltoqsan aiynda bastalyp, nysan 20,5 ga aýmaqta ornalasqan. Keshenge Jibek joly dáýirindegi saýdagerler men qolónershiler kóshesi, «ushatyn teatr», at shoýyn ótkizýge arnalǵan amfiteatr, Shyǵys bazary, saýda sóreleri men býtikter, qonaq úiler men meiramhanalar, SPA jáne fitnes-ortalyq, kinoteatr, otbasylyq oiyn-saýyq ortalyǵy kiredi.
Bul rette, barlyq qurylymdar sý arnasy arqyly bailanystyrylǵan, onda sýdaǵy «qaiyq sherýi» teatrlandyrylǵan shoýy ótkiziledi. «Kerýen-Sarai» kesheniniń Ortalyq Aziiada balamasy joq jáne ol Qoja Ahmet Iasaýi kesenesinen keiin óńirge týrister men investitsiialardy tartatyn basty ortalyqqa ainalady dep kútilýde. Jibek jolynyń tarihi saýda kóshesin qurý esebinen týristerdi tartý jáne týrizmdi, sondai-aq shaǵyn jáne orta biznesti damytý josparlanǵan. Qazir osynaý keshendi kórsem, tarihymen tanyssam dep kórshi memleketterden, el ishinen týrister kóptep kelýde.
