Aziiadaǵy qaýipsizdik jáne yntymaqtastyq uiymyn qurý qajet. Bul týraly búgin elordada ótken Astana klýbynyń jalpy otyrysynda QR Prezidenti Nursultan Nazarbaev aitty, dep habarlaidy QazAqparat tilshisi.
«Menińshe, Aziiaǵa ujymdyq qaýipsizdik uiymy qajet, onyń paida bolýy da ýaqyt enshisinde dep oilaimyn. Búginde Aziia qurlyǵynyń 30 memleketi qatysatyn Aziiadaǵy ózara is-qimyl jáne senim sharalary keńesi atty qazaqstandyq bastama bolashaq Aziiadaǵy qaýipsizdik jáne yntymaqtastyq uiymynyń irgetasy bola alar edi», - dep atap ótti Elbasy.
Qazaqstan Prezidentiniń aitýynsha, Aziiadaǵy qaýipsizdik jáne yntymaqtastyq uiymy men Eýropadaǵy qaýipsizdik jáne yntymaqtastyq uiymy búkil Eýraaziialyq sýbqurlyqtaǵy qaýipsizdikti qamtamasyz ete alar edi.
«Osynaý ideiany júzege asyrý jolyndaǵy alǵashqy qadam retinde EQYU, AÓSShK jáne ASEAN-nyń qaýipsizdik jónindegi óńirlik forýmynyń birlesken konsýltatsiialyq otyrysyn ótkizýdi usynamyn. Atalǵan forýmnyń hatshylyqtary ustanymdaryn salystyrý úshin kezdese alady. Biz ustanymymyzdy joǵaryda atap ótken uiymdarǵa resmi túrde jetkizetin bolamyz», - dedi Nursultan Nazarbaev.
Aita keteiik, Elbasy jiyn barysynda Úlken Eýraziianyń sulbasy qalyptasyp kele jatqanyn aityp, Resei, AQSh jáne Qytai arasyndaǵy geosaiasi básekelestikke alańdaýshylyq tanytty.
Sonymen qatar Nursultan Nazarbaev álemdik derjavalar qarýlaný jarysyna qaita oralýy múmkin ekendigin eskertti.
