Búgin Aqordada Elbasy Nursultan Nazarbaevtyń Qazaqstannyń áielder qaýymy ókilderimen «Kóktem shýaǵy» atty kezdesýi ótip jatyr, dep habarlaidy QazAqparat.
«Qymbatty hanymdar! Jyl saiyn Aqordada dástúrli «Kóktem shýaǵy» dál osy kezde ótkiziledi. Ony ózderińiz bilesizder. Aldaǵy kele jatqan mereke - áielder kúni barshańyzǵa qutty bolsyn! Baq-bereke, jaqsylyq tileimin! Búgin bizdiń ortamyzda áiel azamattarynyń ár salada qyzmet istep júrgen ókilderi bar. Kóp balaly analar, depýtattar, ǵalymdar, sot, diqan, kásipker, ónertapqysh, dáriger, ánshi, jýrnalist, aktrisa, sportshy, jaýyngerge deiin aramyzda otyr», - dedi kezdesýdi ashqan Elbasy.
Memleket basshysy Qazaqstan áielderiniń qoǵamdaǵy róline ár ýaqytta nazar aýdarylyp kele jatqanyn basa aitty.
«Biz anany, áieldi ár ýaqytta qurmettep, joǵary baǵalap ótken halyqpyz. Batyr analarymyz el basyna kún túskende erlermen birge qolyna qarý alyp, Otanyn qorǵaǵan. El úshin er-azamattarmen birge jaýǵa shapqan baiaǵydan kele jatqan, bizge belgili Bopai hanym, Hiýaz Dospanova, Áliia, Mánshúkter óshpes erlikterimen eldiń sanasynda qalǵanyn bárimiz bilemiz. Qazaq áielderiniń arasynda zor qurmetke bólengen úlken analarymyz Domalaq ana, Aisha bibi, Aiǵanym hansha, Zere ájelerimiz parasattyń simvoly bolyp sanalady. Búgingi Qazaqstan áielderi - sol parasatty jalǵastyratyn, jolyn jalǵaityn izbasarlary. "Áiel - úidiń qazyǵy" dep áielin qurmettegen halyqpyz. "Qyz ósse, eldiń kórki" dep qyzyn qurmettegen halyqpyz. Uly dalada qily zamannan kele jatqan igi dástúr qazir de jalǵasýda», - dedi Nazarbaev.
Aita keteiik, kezdesýge Májilis depýtaty Zaǵipa Balieva, ǵalym-mikrobiolog Áliia Ernazarova, Ýniversiada-2017 chempiony Anna Shevchenko, QHA múshesi, aýyl mektebiniń direktory Irina Sedova, «Jas Atameken» jas kásipkerler klýbynyń prezidenti Zarina Kókjanova, aqyn Tolqyn Qabylsha, ánshi Mariia Galitskaia, «Teńizshevroil» JShS adam resýrstaryn basqarý bas menedjeri, aýdandyq aýrýhananyń bas dárigeri Qarlyǵash Rázieva, Ulttyq ekonomika vitse-ministri Mádina Ábilqasymova, «Astana-Balet» teatrynyń jetekshi balerinasy Milana Býkanova, kópbalaly ana Oksana Mýkasheva, qobyzdan halyqaralyq baiqaýlardyń laýreaty Aqerke Tájibaeva, Astana qalalyq kámeletke jasy tolmaǵandar isi jónindegi mamandandyrylǵan aýdanaralyq sottyń tóraǵasy Naziliia Razzak, Abai atyndaǵy memlekettik akademiialyq opera jáne balet teatrynyń solisi Oksana Davydenko, QR QK Parashiýt daiyndyǵy ortalyǵynyń aǵa mamany Rimma Ramazanova, aktrisa Saltanat Baqaeva, jýrnalist Venera Mirlanqyzy qatysýda.
.jpeg)