Marqum Nurai Serikbaidyń isine qatysty tyń aqparat tarady, dep habarlaidy ult.kz.
Sot tikelei efirde ótpeitin boldy. Bul týraly jábirlenýshi taraptyń advokaty aitty.
“Nuraidyń isi boiynsha sot tikelei efirde ótkizýden bas tartty. Alaida jýrnalisterge sotqa qatysýǵa, túsirýge kedergi joq ekendigin jetkizdi. Sot otyrystary ár aptanyń seisenbi jáne juma kúnderi tańerteńgi saǵat 10:00-de ótetin boldy”, - dep jazdy Aianhan Omarov.
Qoǵamdy dúr silkintken is
Nurai Serikbai – Shymkent qalasynda bilim alyp júrgen 21 jastaǵy stýdent bolǵan. Qaiǵyly oqiǵa 2026 jylǵy 11 qańtarda oryn aldy. Tergeý málimetinshe, qyz tanysy tarapynan pyshaq jaraqatyn alyp, oqiǵa ornynda kóz jumǵan. Kúdikti kóp uzamai ustalyp, oǵan qatysty adam óltirý deregi boiynsha qylmystyq is qozǵaldy.
Qylmys qoǵamda úlken narazylyq týǵyzdy. Áleýmettik jelilerde myńdaǵan adam ádil tergeý júrgizýdi talap etti. Marqumnyń týystary alǵashqy kúnnen bastap istiń ashyq qaralýyn surap, keibir jaittardyń tolyq zerttelmegenin birneshe ret málimdedi. Olardyń aitýynsha, qylmystyń mán-jaiyn jan-jaqty tekserý qajet bolǵan.
Oqiǵadan keiin Ishki ister ministrligi qyzmettik tekserý júrgizdi. Nátijesinde Shymkent qalalyq politsiia departamentiniń birqatar basshylary qyzmetinen bosatylyp, keibir politsiia qyzmetkerlerine qatysty qylmystyq is qozǵaldy. Tergeý barysynda oqiǵa týraly habarlamalarǵa der kezinde áreket etpeý jáne qyzmettik mindetterdi tiisinshe oryndamaý faktileri tekserilgeni habarlandy.
Sonymen qatar, qoǵamda kúdiktiniń psihikalyq jaǵdaiyna qatysty máseleler de qyzý talqylandy. Tergeý barysynda oǵan sot-psihiatriialyq saraptama taǵaiyndalyp, belgili bir kezeńde arnaiy meditsinalyq mekemege ornalastyryldy. Keiin saraptama qorytyndysy boiynsha onyń qylmys jasaǵan kezde aqyl-esi durys bolǵany týraly málimet jariialandy.
2026 jyldyń maýsym aiynda Nurai Serikbaidyń ólimine qatysty sotqa deiingi tergeý aiaqtaldy. Jábirlenýshi taraptyń advokaty istiń birneshe tomnan turatyn materialdarymen tanysqanyn málimdedi.
