Elordada balkony «qisaiǵan» úige ákimdiktiń tótenshe rezervinen 23 mln teńge bólindi, dep habarlaidy QazAqparat.
Bul týraly elordalyq qalalyq orta sapasy jáne baqylaý basqarmasy basshysynyń orynbasary Dáýlet Dosqulov aityp berdi.
«Ákimdiktiń tótenshe rezervinen bul úidiń jobalyq-tehnikalyq qujattamasyn ázirleýge 23 mln teńge bólindi. Onyń alǵashqy kezeńi – tehnikalyq tekserý jumystary aiaqtalyp qaldy. Ári qarai memlekettik saraptamadan ótý úshin jobalyq-smetalyq qujattama rásimdeledi. Bul qujattarsyz jumys isteý múmkin emes. Shamamen 1,5-2 aida jobalyq-smetalyq qujattama daiyn bolady jáne taǵy bir aida memlekettik saraptama júrgiziledi», - dedi D. Dosqulov qalalyq ákimdikte bergen suhbatynda.
Onyń aitýynsha, balkony qisaiǵan páterdiń jáne tutas úidiń jóndeý jumystary ákimdik rezervi esebinen júrgiziledi.
«Munyń barlyǵy rezerv aiasynda sheshiledi. Eger páter iesi óz esebinen jóndeý júrgizgisi kelse, oǵan ruqsat beriledi. Al jalpy, bul – turǵyndardy zańsyz ornalastyrǵan úi salýshylardyń kinási», - dedi ákimdik ókili.
Eske sala ketsek, «Orbita» turǵyn úi kesheni páterlerdiń birinde balkon ornynan «jyljyp» ketip, eden dirildegen. Qalalyq ákimdiktiń habarlaýynsha, olar problemaly turǵyn úi týraly biledi. Qazirgi ýaqytta ol jaqta tehnikalyq tekserý júrgizilip jatyr, odan keiin úidiń apattyq deńgeii anyqtalady.
Ákimdiktiń habarlaýynsha, úi paidalanýǵa berilmese de, úi salýshylar 6 jyl buryn turǵyndardy zańsyz ornalastyrǵan. Ondaǵy eń qaýipti nárse – úidiń qasbeti jáne turǵyndardy evakýatsiialaýdyń qajeti joq.
