Nur-Sultanda bes jyldan beri baspanasyn kútip júrgen 600-ge jýyq úlesker biyl jańa páterge qonystanady.
Bul jaiynda qala ákimi Altai Kólginov Instagram paraqshasynda málim etti.
«Baspana Kóktal» kóppáterli turǵyn úi kesheni birneshe jer ýchaskesinde ornalasqan. Ol 13 úiden turady. Onyń bireýi ǵana aiaqtaldy. Bes jyl buryn qalǵan 12 úi qurylysy uzaqqa sozylǵan nysan retinde tanyldy. Olardyń árqaisynda sheshilmegen, problemalyq máseleler boldy: shatyrdan sý ketý, qasbettiń, terezelerdiń, esikterdiń, lift shahtalarynyń bolmaýy. Jaryq, jylý, sý men káriz júieleri de injenerlik jelilerge qosylmady. Úleskerlermen birneshe ret kezdesip, josparly qurylys kestesin qurdyq» dep jazdy shahar basshysy.
Onyń sózine sensek, bul úide 600-ge jýyq otbasy páterin kútip júr. Burynǵy qurylysshy birneshe qabatty zańsyz salyp, lifti qarastyrmaǵan. Qurylys salasyndaǵy qoldanystaǵy normalarǵa sáikes ǵimarat 6 qabattan assa, mindetti túrde liftimen qamtamasyz etilýi tiis.
Sondai-aq, órtke qarsy evakýatsiialyq baspaldaqtar da bolmaǵan.
«Osyǵan bailanysty lifti men evakýatsiialyq baspaldaq ornatý úshin bólimderdi bólshekteý qajet boldy. Barlyq atalǵan qurylys jumystary júrgizilip jatyr. Turǵyn úi keshenin «Elorda qurylys kompaniiasynyń» qatysýymen «Nurly jer» baǵdarlamasy aiasynda salyp jatyrmyz. Qurylys qarqynyn kúsheitip, úilerdi jyl sońyna deiin aiaqtaýdy tapsyrdym. Aýmaqty abattandyrý kóktemge josparlanǵan» deidi Altai Kólginov.
