QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń kezekti otyrysy ótti, dep habarlaidy primeminister.kz.
Elimizdegi sanitarlyq-epidemiologiialyq jaǵdai týraly densaýlyq saqtaý ministri E. Birtanov, Nur-Sultan men Almaty qalalarynda biznes sýbektileri qyzmetiniń jekelegen túrlerin qaita bastaý máselesi týraly Premer-Ministrdiń orynbasary E. Toǵjanov, sondai-aq ákimder A. Kólginov pen B. Saǵyntaev baiandady.
QR Prezidenti Q. Toqaevtyń tapsyrmasyn júzege asyrý aiasynda Memlekettik komissiia biylǵy 20 sáýirden bastap qatań sanitarlyq-epidemiologiialyq sharalardy saqtai otyryp, Nur-Sultan jáne Almaty qalalarynda jumysyn qaita bastaityn kásipkerlik sýbektileriniń qyzmet túrleriniń tizimin bekitti.
Nur-Sultan qalasynda:
ónerkásiptik kásiporyndar;
qurylys jáne jol-qurylys salalarynyń kompaniialary, iri qurylys dúkenderi;
kólik, qoimalaý salalaryndaǵy kompaniialar, aýyl sharýashylyǵy maqsatyndaǵy servistik kompaniialar;
avtosalondar, TQS, avto jýý, dóńgelek aýystyrý servisi, avtobólshekter dúkenderi, himiialyq tazalaý, keńse tehnikasyn jóndeý;
ekinshi deńgeili bankter saǵat 9:00-den 16:00-ge deiin shtat sanynyń 50%-yn shekteýmen, notarýister aldyn ala jazylý boiynsha jumys isteidi;
qoǵamdyq tamaqtaný nysandarynyń jumysy tek ózimen alyp ketý jáne jetkizý qyzmetimen saǵat 22:00-ge deiin uzartylady.
Almaty qalasynda:
ónerkásiptik kásiporyndar;
qurylys jáne jol-qurylys salalarynyń kompaniialary, qurylys materialdarynyń iri kóterme bazarlary;
notariýster aldyn ala jazylý boiynsha;
tek bizneske qyzmet kórsetý úshin HQKO bir bólimshesi (Naýryzbai aýdany, Shuǵyla shaǵyn aýdany, 347/1).
Nur-Sultan jáne Almaty qalalaryndaǵy shuǵyl shtabtar kásiporyndar men kásipkerlik sýbektileriniń naqty tizimin, olardyń qyzmetkerleriniń naqty sanyn, jumys ýaqytyn jáne jetkizilý tásilin anyqtaidy.
Úkimet basshysy Nur-Sultan jáne Almaty qalalarynyń ákimderine tiisti sharalardy qabyldap, jumysy qaita jandanatyn nysandarda sanitarlyq-epidemiologiialyq qaýipsizdiktiń saqtalýyna qatań baqylaý jasaýdy qamtamasyz etýdi tapsyrdy.
Otyrysqa qatysýshylar sonymen qatar karantin engizilgen qalalarǵa aýyl sharýashylyǵy taýarlaryn jetkizýshilerdiń avtomashinalaryn ótkizý, karantin kezinde kóktemgi egis jumystaryn uiymdastyrý, aýyl sharýashylyǵy ónimderin forvardty satyp alýdy ótkizý, karantin engizilgen qalalardyń turǵyndary úshin kommýnaldyq tólemderdi azaitý, azyq-túlik jáne turmystyq jiyntyqtardy usynýdy aqshalandyrý jáne t. b. máselelerdi qarastyrdy.
Premer-Ministr tiisti sanitarlyq-epidemiologiialyq normalardy saqtaýmen fermerlerdiń egis jumystarymen bógetsiz ainalysýyn qamtamasyz etýdi, karantin engizilgen qalalarǵa aýyl sharýashylyǵy taýarlaryn jetkizýshilerdiń avtomashinalaryn ótkizýdiń biryńǵai tártibin engizýdi jáne júkterdiń negizsiz bógelýin boldyrmaýdy tapsyrdy.
Memlekettik komissiia Indýstriia jáne infraqurylymdyq damý ministrligi ázirlegen tótenshe jaǵdai kezeńinde Kommýnaldyq qyzmetterdi jetkizýshilerdiń shyǵyndaryn óteý erejesiniń jobasyn qarady.
«Usynylǵan tetik turǵyndar úshin de, kommýnaldyq kásiporyndar úshin de olardyń úzdiksiz jumysyn qamtamasyz etý maqsatynda memlekettik qoldaýdyń pármendi sharasyna ainalýy tiis», — dedi Úkimet basshysy.
Jedeldikti jáne azamattardyń qaýipsizdigin qamtamasyz etý maqsatynda Memlekettik komissiia Eńbek jáne halyqty áleýmettik qorǵaý ministrligi engizgen azyq-túlik jáne turmystyq jiyntyqtardy jeke tulǵalardyń shotyna aqshalai qarajatty aýdarý arqyly berý týraly usynysty maquldady.
«Óńirlerdiń ákimdikteri usynylǵan tetikke sáikes kómekti alýshylarǵa aqshalai qarajattyń ýaqytyly aýdarylýyn qamtamasyz etýi kerek. Karta shottary bolmaǵan jaǵdaida nemese kómek alýshylardyń jasyna ne múgedektigine bailanysty kelýge múmkindigi bolmasa, sanitarlyq talaptardy saqtai otyryp, azyq-túlik jiyntyǵyn úige jetkizýdi qamtamasyz etý qajet», — dedi A. Mamin.
