«Nur Otan» partiiasynyń ókilderi Shemonaiha aýdanynyń Qyzyl Shemonaiha aýylyna aýyzsý tartý jobasynyń barysyna reid jasady, dep habarlaidy QazAqparat tilshisi.
Qurylysy keshikken joba byltyr jeltoqsanda bitýi tiis bolǵan. Aýyl halqy aýyzsýdy kútip áli otyr. Aýdan ákiminiń orynbasary Baqytjan Moldahanovtyń aitýynsha, mundai kemshilikke merdiger kompaniianyń salǵyrttyǵy sebepker bolǵan.
«Qyzyl Shemonaiha aýylyna sý toǵany 1970 jyly salynǵan. Sondyqtan orynan jańasyn salý áldeqaida tiimdi edi. 2013 jyly daiyn bolǵan jobaǵa qarjy 2,5 jyldan keiin ǵana tabyldy. «Nurly» jol baǵdarlamasy aiasynda 262 mln teńge bólingen bolatyn. Nysan ýaqytynda berilmegen soń, is sotqa ketti. Sot sheshmi boiynsha «Óskemen Qurylys» kompaniiasyna qalǵan jumysty 2018 jyldyń qańtaryna deiin bitirýdi tapsyrylǵan. Nátije joq» - deidi ákimdik ókili.
Qurylystyń jobalyq smetasyna orta jolda ózgeris engen eken. Bul da merzimnen keshigýine ákep soqtyrǵan. Ondai bastamany kótergen tapsyrys berýshiniń ózi bolyp otyr.
«Qubyr júretin jerden jartas beldeýi shyqty. Eger ony ainalyp ótetin jańa joba jasalmasa, aýyzsý aýyl úshin altynnyń baǵasyndai qymbatqa túsetin edi. Partiialyq qadaǵalaý komissiiasy jer qyrtysyn esepke alý kerek degen ustanymda. Óitkeni o basta qubyrdyń jobasy durys jasalmaǵan. Sol úshin aýdan biýdjetinen 3,4 mln teńge bólinip otyr. Jetildirilgen joba tek tamyzdyń aiaǵyna qarai daiyn bolmaq. Odan keiin qubyr tartý jumystaryna qosymsha qarjy izdestirilmek. Óitkeni, jumys kesheýildegen shaqta igerilip úlgermegen 68 mln teńge respýblikalyq biýdjetke qaitarylǵan bolatyn», - deidi «Nur Otan» partiiasynyń aýdandyq filial tóraǵasynyń birinshi orynbasary Elena Shabanova.
