«نۇر وتان» پارتيياسىنىڭ ٶكٸلدەرٸ شەمونايحا اۋدانىنىڭ قىزىل شەمونايحا اۋىلىنا اۋىزسۋ تارتۋ جوباسىنىڭ بارىسىنا رەيد جاسادى, دەپ حابارلايدى قازاقپارات تٸلشٸسٸ.
قۇرىلىسى كەشٸككەن جوبا بىلتىر جەلتوقساندا بٸتۋٸ تيٸس بولعان. اۋىل حالقى اۋىزسۋدى كٷتٸپ ەلٸ وتىر. اۋدان ەكٸمٸنٸڭ ورىنباسارى باقىتجان مولداحانوۆتىڭ ايتۋىنشا, مۇنداي كەمشٸلٸككە مەردٸگەر كومپانييانىڭ سالعىرتتىعى سەبەپكەر بولعان.
«قىزىل شەمونايحا اۋىلىنا سۋ توعانى 1970 جىلى سالىنعان. سوندىقتان ورىنان جاڭاسىن سالۋ ەلدەقايدا تيٸمدٸ ەدٸ. 2013 جىلى دايىن بولعان جوباعا قارجى 2,5 جىلدان كەيٸن عانا تابىلدى. «نۇرلى» جول باعدارلاماسى اياسىندا 262 ملن تەڭگە بٶلٸنگەن بولاتىن. نىسان ۋاقىتىندا بەرٸلمەگەن سوڭ, ٸس سوتقا كەتتٸ. سوت شەشمٸ بويىنشا «ٶسكەمەن قۇرىلىس» كومپانيياسىنا قالعان جۇمىستى 2018 جىلدىڭ قاڭتارىنا دەيٸن بٸتٸرۋدٸ تاپسىرىلعان. نەتيجە جوق» - دەيدٸ ەكٸمدٸك ٶكٸلٸ.
قۇرىلىستىڭ جوبالىق سمەتاسىنا ورتا جولدا ٶزگەرٸس ەنگەن ەكەن. بۇل دا مەرزٸمنەن كەشٸگۋٸنە ەكەپ سوقتىرعان. ونداي باستامانى كٶتەرگەن تاپسىرىس بەرۋشٸنٸڭ ٶزٸ بولىپ وتىر.
«قۇبىر جٷرەتٸن جەردەن جارتاس بەلدەۋٸ شىقتى. ەگەر ونى اينالىپ ٶتەتٸن جاڭا جوبا جاسالماسا, اۋىزسۋ اۋىل ٷشٸن التىننىڭ باعاسىنداي قىمباتقا تٷسەتٸن ەدٸ. پارتييالىق قاداعالاۋ كوميسسيياسى جەر قىرتىسىن ەسەپكە الۋ كەرەك دەگەن ۇستانىمدا. ٶيتكەنٸ و باستا قۇبىردىڭ جوباسى دۇرىس جاسالماعان. سول ٷشٸن اۋدان بيۋدجەتٸنەن 3,4 ملن تەڭگە بٶلٸنٸپ وتىر. جەتٸلدٸرٸلگەن جوبا تەك تامىزدىڭ اياعىنا قاراي دايىن بولماق. ودان كەيٸن قۇبىر تارتۋ جۇمىستارىنا قوسىمشا قارجى ٸزدەستٸرٸلمەك. ٶيتكەنٸ, جۇمىس كەشەۋٸلدەگەن شاقتا يگەرٸلٸپ ٷلگەرمەگەن 68 ملن تەڭگە رەسپۋبليكالىق بيۋدجەتكە قايتارىلعان بولاتىن», - دەيدٸ «نۇر وتان» پارتيياسىنىڭ اۋداندىق فيليال تٶراعاسىنىڭ بٸرٸنشٸ ورىنباسارى ەلەنا شابانوۆا.
