Keshe Astanada «Abý-Dabi Plaza» qurylys kesheniniń 400-ge jýyq jumysshysy zańsyz jumystan shyǵaryp jiberilgeni týraly málimdeme jasady. Ózderiniń aitýynsha, olar jumystan shyǵarý týraly eshqandai eskertý almaǵan. Atalǵan qysqartýlar jaiynda tek jumysqa kelgen kezde bir-aq bilgen.
Qurylysshylar osy shielenisken jaǵdaidy sheshý úshin «Nur Otan» partiiasyna júgingen bolatyn.
Soǵan orai keshe olar partiianyń Astana qalalyq filialy basshylyǵymen kezdesti.
Osy máselege qatysty «Nur Otan» partiiasy Tóraǵasynyń Birinshi orynbasary Máýlen Áshimbaev óz pikirin bildirdi. Onyń aitýynsha, «Nur Otan» Astana qalalyq prokýratýrasymen birlesip jumys isteýde. Búginde qalalyq prokýratýra bul sheshimniń qanshalyqty zańdy ekenin tekserý ústinde. Máseleniń mánin anyqtaý úshin Astana qalasynyń ákimdigi de tartylǵanyn atap ótken jón.
«Osy máseleni ońtaily sheshý úshin barlyq qajetti jumystar qolǵa alyndy. Bul jaǵdaidy «Nur Otan» partiiasy óz baqylaýynda ustaidy. Mundai sátte sabyrlyq tanytýdyń mańyzy zor. Qalanyń quqyq qorǵaý organdary men ákimdigi de jumys isteýde. Osylai kúsh biriktirý arqyly bul keleńsiz jaǵdaidyń oń sheshilýine senim bildiremin», – dedi Máýlen Áshimbaev.
