"Novichok" áskeri ýynyń qaldyqtary qalǵan bótelke Tomsk qonaq úiindegi Aleksei Navalnyidyń bólmesinen tabyldy. Bul týraly "Proekt" basylymy jáne Navalnyidyń Instagram-daǵy blogy jazdy. Osyǵan qarap reseilik oppozitsiialyq saiasatker áýejai nemese ushaqta emes, qonaq úide ýlandy dep topshylaýǵa bolady. Buǵan deiin "Taiga.info" basylymy qonaq úidiń aimaqtaǵy joǵary laýazymdy sheneýnikter men kúshtik qurylym ókilderimen tyǵyz bailanysta ekenin jazǵan.
Jemqorlyqpen kúres qory (JKQ) qyzmetkerleriniń biri "Proekt" basylymyna qonaq úiden bótelkeni Berlinge JKQ ókili Mariia Pevchih jetkizgenin aitty. Osydan soń Resei biligimen tyǵyz bailanysty aqparat quraldary Pevchihti qaralap, ony Navalnyimen intimdik qarym-qatynasta boldy, oǵan sol ý berýi múmkin dep aiyptady.
Basylymnyń jazýynsha, Tomsk ýaqytymen tańerteńgi saǵat ondar shamasynda Navalnyi mingen ushaq Ombyǵa qonǵan jáne ol týraly jańalyq birden áriptesterine jetken. Tomskide qonaq úide qalǵandar osy ýaqytta birinshi qabatta tańǵy as iship otyrǵan. Olar birden ýlanýǵa qatysy bolýy múmkin zattardyń bárin jinaýǵa tyrysqan. "Aiǵaqtardy sol kúiinde saqtaýǵa kúsh saldyq" dedi Navalnyi shtabynyń Tomskidegi ókili "Proekt" basylymyna.
Buǵan ýaqyt ta múmkindik bergen: Navalnyi qonǵan bólmeni ol kezde jańa adamdarǵa berip te úlgermegen. Al qonaq úide tazalaý jumystary tańerteńgi saǵat 10-11-lerde bastalady. Buǵan sol jaqta zertteý úshin qonyp shyqqan "Proekt" tilshisiniń de kózi jetken.
Ol jaqta qalǵan JKQ qyzmetkelerine jergilikti shtab belsendileri kómekke kelgen, olar Navalnyi turǵan 239 bólmege kezekshi qoiǵan. Aqyry ol jerden oppozitsiialyq saiasatker tańerteń qoldanǵan bolýy múmkin birneshe zat alynǵan. Olardyń arasynda "Sviatoi istochnik" markaly aýzy ashylǵan sý bótelkesi bolǵan. JKQ qonaq úi bólmesin tekserý kezindegi videony da jariialady.
Jemqorlyqpen kúres qory qyzmetkeriniń aitynsha, saiasatkerdiń ózi bótelkeden qashan sý ishkenin esine túsire almaǵan. Degenmen sýdyń quramynda ý bolmaǵan siiaqty. "Novichok" ýyn shyǵarýǵa atsalysqandardyń biri Vladimir Ýglev "Proekt" basylymyna eger ý sýmen birge saiasatkerdiń aǵzasyna túsken bolsa, onda sol sátte-aq birneshe minýttan soń "dirildep, qaltyrai bastar edi" degen.
Navalnyi jaǵdaiynyń nasharlaý dinamikasyn saraptaǵan Ýglev saiasatkerdiń denesine ý tiiýi múmkin dep topshylaidy. Al biraq oǵan qaidan jaǵylǵany belgisiz. Qonaq úiden alynǵan ózge zattardan "Novichok" qaldyqtary tabyldy ma, joq pa, ázirge aitylmaidy.
"Proektiniń" jazýynsha, zertteýge qonaq úidegi baqylaý kamerasyna túsken jazbalar kómektesýi múmkin. Navalnyi bólmesinde bolǵan oqiǵalar birden eki kameraǵa jazylǵan. Ol jazbalar quqyq qorǵaý organdarynyń qolynda.
