2026 jyldyń 8 qyrkúiekten bastap Qazaqstanda jyljymaityn múlikti satý, syiǵa tartý nemese kepilge qoiý týraly shartty tek nysan ornalasqan jerdegi notariýs kýálandyra alady. Buǵan deiin menshik iesi ózine yńǵaily kez kelgen notariýsqa júgine alatyn. Endi mundai múmkindik bolmaidy, dep habarlaidy ult.kz.
Bul norma «Notariat týraly» zańnyń 54-babynda bekitilgen. 2026 jylǵy 8 shildedegi zańmen bapqa 2-1-tarmaq qosyldy. Onda:
«Tirkelýge jatatyn jyljymaityn múlikti ielikten shyǵarý jáne kepilge qoiý týraly shartty kýálandyrý osy múlik ornalasqan jer boiynsha júrgiziledi», dep kórsetilgen.
Zań shilde aiynda jariialanyp, 60 kúntizbelik kún ótken soń, iaǵni 8 qyrkúiekten bastap kúshine endi.
Múliktiń ornalasqan jeri notariýstyń qyzmet aýmaǵymen bailanysty. Al notariýstyń qyzmet aýmaǵy notariattyq okrýg sheginde belgilenedi. Zańnyń 20-babyna sáikes, notariattyq okrýg – oblystyń, respýblikalyq mańyzy bar qalanyń nemese astananyń aýmaǵy.
Sonymen qatar zańnyń 21-babyna da ózgerister engizildi. Endi 54-bap notariýs qyzmetiniń aýmaǵyn saqtaýdy talap etetin notariattyq áreketter tizimine tikelei engizilgen. Al notariýs keńsesinen tys jerde notariattyq áreketterdi tek óz notariattyq okrýgi sheginde jasaýǵa ruqsat etiledi.
Bul ózgeristiń qarapaiym azamattarǵa qalai áser etetinin notariýs Karina Tólepova óziniń blogynda túsindirdi:
«Búgin jańa ereje kúshine endi: eger jyljymaityn múlikti satsańyz, syiǵa tartsańyz nemese kepilge qoisańyz, shartty tek sol múlik ornalasqan qaladaǵy notariýs kýálandyrady. Páter Almatyda bolsa – Almatydaǵy notariýsqa barasyz. Úi Shymkentte bolsa – notariýs tek Shymkentte. Astanadaǵy ózińizge yńǵaily notariýs endi kómektese almaidy».
Basqa óńirde turatyn menshik iesiniń endi eki joly bar. Alaida eki jaǵdaida da qosymsha shyǵyn qarastyrylǵan. Notariýs bul týraly bylai túsindirdi:
«Bul jaǵdaida senimhat jazdyryp, oǵan teń mándiligin rastaýyńyz kerek jáne osynyń bári úshin notariýsqa qosymsha aqy tóleisiz. Nemese jyljymaityn múlik ornalasqan qalaǵa baryp kelýge týra keledi».
Munda notariýs qaǵaz túrindegi qujattyń elektrondyq qujatqa jáne kerisinshe teń mándiligin rastaityn notariattyq áreket týraly sóz bolyp otyr. Bul áreket Notariattyq áreketter jasaý qaǵidalarynda bekitilgen tizimge engizilgen jáne senimhatty basqa qalaǵa elektrondyq túrde jiberýge múmkindik beredi.
Bul áreketterdiń árqaisysy Ádilet ministriniń buiryǵymen bekitilgen mólsherlemeler boiynsha jeke tólenedi.
Aldaǵy ýaqytta jyljymaityn múlik boiynsha mámile jasaýdy josparlaǵan azamattarǵa eki jaitty aldyn ala teksergen jón.
Birinshiden, notariýs satýshy men satyp alýshynyń qai jerde turatynyna qaramastan, múlik ornalasqan aýmaqta qyzmet etýi kerek.
Ekinshiden, eger múlik ornalasqan qalaǵa barý múmkin bolmasa, senimhatty aldyn ala rásimdegen jón. Bul rette mámile biýdjetine senimhattyń ózin jáne oǵan teń mándiligin rastaý shyǵyndaryn da qosý qajet.
