Parlament Senatynyń jalpy otyrysynda palata depýtattary «Qazaqstan Respýblikasynyń keibir zańnamalyq aktilerine notariat máseleleri boiynsha ózgerister men tolyqtyrýlar engizý týraly» Zańdy qabyldady, dep habarlaidy QazAqparat.
Qujat Parlament depýtattary bastamashylyǵymen daiyndaldy.
«Elimizde qyzmeti júieli, qalyptasqan notariattyq qyzmet atqarylady.17 aimaqtyq, 1 respýblikalyq notariattyq palatada, 4267 notariýs qyzmet atqaryp keledi. Zamanaýi notariat qyzmetin odan ári normativtik retteý úshin jańa qajettilikter týyndap otyr. Maqsat - notariat salasynda azamattardyń zańdy múddelerin qorǵaýdyń quqyqtyq júiesin jetildirý. Jobada «notariattyq akt» uǵymyn engizý, notariattyq qupiiany reglamenteý, basqarý organdarynyń ókilettikterin naqtylaý, jańa notariattyq is áreketterdi engizý, elektrondyq notariat qalyptastyrý jáne taǵy basqa mańyzdy naqtylaýlar bar», - dedi Senat depýtaty Lázzat Súleimen.
Atap aitqanda, notariattyq qyzmetti odan ári tsifrlandyrý eskerilgen. Notariattyq qujattardyń elektrondyq nysanda saqtalýyn, esepke alynýy men paidalanylýyn qamtamasyz etetin elektrondyq júie (repozitarii) qurý kózdelip otyr. Bul jerde, zań jobasy qaǵazdaǵy qujat pen elektrondyq qujattyń teń mándiligin kýálandyrýdi qamtamasyz etýdi de mindettep otyr. Notariattyq qujatqa QR-kod beriledi, osy negizde saqtalady, túpnusqalyǵy rastalady. Bul repozitarii 2022 jylǵy 1 qańtardan júzege asa bastaýy tiis.
Biryńǵai notariattyq aqparattyq júiege málimetterdi engizý, qol jetkizý, paidalaný, qorǵaý tártibin ýákiletti organdar naqty reglamenttep, aiqyndaýy qajet. Bul baǵytta Ádilet ministrligi, Tsifrlandyrý ministrligi, Respýblikalyq palata aldynda osy qyzmetti saýatty úilestirý mindetteri tur.
«Notariýstardyń qyzmetterine shaǵymdardy qaraityn – Tártiptik komissiia qurylady, ol táýelsiz organ bolyp sanalady jáne Respýblikalyq notariattyq palatanyń sezinde sailanyp, esep beredi. 2020 jyly 33 notariýstyń litsenziiasy ýaqytsha toqtatylǵan.
Engizilip otyrǵan ózgerister, notariýstar men zańgerler kezdesýi barysynda týyndaǵan usynystardyń nátijesi», - dedi senator.
Senat spikeri Máýlen Áshimbaev atalǵan zań elimizde notariat institýtyn odan ári jetildirýdi kózdeitinin atap ótti.
«Qazirgi tańda Qazaqstanda bul salada jumys isteitin tórt myńnan astam notariýs bar. Osy zań halyqqa notariattyq qyzmet kórsetý kezinde tsifrlyq tehnologiialardyń qoldaný aiasyn keńeitýge múmkindik beredi. Sondai-aq, notariattyq qyzmetke qoiylatyn talaptardy kúsheitýge quqyqtyq negizder qalyptastyrady», - dep atap ótti Senat tóraǵasy.
