2021 jyldyń 1-toqsanynda jergilikti memlekettik organdardyń normativtik-quqyqtyq akilerin tirkeý rásimin ortalyqtandyrylǵan formatqa kóshirý josparlanýda. Bul týraly QR Ádilet vitse-ministri Natalia Pan aitty, dep habarlaidy QazAqparat.
«Zańdylyq rejimin qamtamasyz etý normativtik-quqyqtyq aktiler (NQA) jobalaryna zań saraptamasyn jáne NQA jobalaryna ǵylymi lingvistikalyq saraptama júrgizý arqyly júzege asyrylady. Osylaisha, 2020 jyly Ádilet ministrligi 37 672 quqyqtyq aktilerdiń jobalaryna saraptama júrgizdi, onyń ishinde: 109 zań jobasy; Prezident Jarlyqtarynyń 100 jobasy; Prezident ókiminiń 3 jobasy; Úkimet qaýlylarynyń 1 130 jobasy; Premer-Ministr ókimderiniń 174 jobasy; ortalyq jáne jergilikti memlekettik basqarý organdarynyń 36 156 normativtik quqyqtyq aktileri. Onyń ishinde 12 895-si tirkeldi. 94-i qaitaryldy nemese tirkeýden bas tartyldy», - dedi ol ministrliktiń keńeitilgen alqa otyrysynda.
Onyń aitýynsha, vedomstvolyq normashyǵarmashylyq máselesi boiynsha servistik modeldi engizý ázirleýshi organdarǵa normativtik quqyqtyq aktilerdiń jobalaryn kelisý satysynda ádilet organdarynyń eskertýlerin joiýǵa múmkindik berdi. Máselen, sońǵy eki jylda tirkeýden bas tartýdyń tómendeýi baiqaldy. Sondai-aq qaita qaraý nátijesi, olardyń sany tirkeýge usynylǵan jobalardyń bir paiyzynan aspady.
«Alaida ádilet organdarynyń maquldaý satysyndaǵy eskertýleri sapasyz pysyqtalǵandyqtan, ár joba ortasha eseppen 3 ret qaita qaraýǵa qaitaryldy. Buǵan tirkelgen 12 895 akti kýá bola alady. Óitkeni kelisýge 36 156 NQA jobalary usynylǵan. Memlekettik jáne orys tilderindegi jobalardyń sáikestigine ǵylymi lingvistikalyq saraptama 160 jobaǵa qatysty júrgizildi. Onyń ishinde: zań jobalary boiynsha - 113, halyqaralyq sharttardyń jobalary boiynsha - 47. 2019 jylmen salystyrǵanda 2020 jyly Prezident, Úkimet jáne Premer-Ministr aktileri jobalarynyń sany 1,1, qaita qaraýǵa qaitarylǵandary 2 paiyzǵa azaidy», - dedi Natalia Pan.
Onyń atap ótýinshe, pysyqtaýǵa qaitarylýdyń tómendeýi ministrliktiń memlekettik organdardyń zań qyzmetterimen memlekettik organdar jibergen qatelikterdi taldaý jáne olardy túzetý qajettiligi turǵysynan júrgizetin jumystarymen bailanysty. Sonymen qatar, 2020 jyly memlekettik organdar tótenshe jaǵdaidy sheshýge baǵyttalǵan 100-ge jýyq normativtik quqyqtyq aktilerdiń jobalaryn ázirlegen.
«NQA-ny elektrondyq tirkeýge tolyq kóshýdi qamtamasyz etýdi eskere otyryp, vedomstvolyq normashyǵarýdy odan ári jetildirý úshin ministrlik jergilikti memlekettik organdardyń NQA tirkeý rásimin ortalyqtandyrylǵan formatqa kóshirý josparlaýda. Pilottyq jobanyń qorytyndylary usynylǵan tetikti iske asyrý múmkindigin kórsetti. Jańa mehanizmdi engizý osy jylǵy 1-shi toqsanǵa josparlanýda», - dedi vitse-ministr.
