Álem ádebietiniń kórnekti ókili, 2012 jylǵy Nobel syilyǵynyń laýreaty, qytai jazýshysy Mo Ian Qazaqstanǵa arnaiy saparmen kelip, jas qalamgerlerge dáris oqydy. Sondai-aq onyń qazaq tiline aýdarylǵan eki kitabynyń tusaýkeseri ótip, jazýshyǵa QazUÝ-dyń Qurmetti professory ataǵy berildi, dep habarlaidy ult.kz.
Is-sharalar Qazaqstan Jazýshylar odaǵy men QR Mádeniet jáne aqparat ministrliginiń strategiialyq áriptestigi aiasynda júzege asyrylyp jatqan «Jas jazýshylardyń ádebi sheberlik mektebi» jobasy sheńberinde uiymdastyryldy.
Kezdesý barysynda Mo Ian kórkem shyǵarma jazýdaǵy tájiribesimen bólisip, ádebiettegi adam bolmysyn beineleý, shyǵarmashylyq izdenis pen jazýshylyq jaýapkershilik týraly oilaryn ortaǵa saldy. Ol jas avtorlarǵa shyǵarmashylyq erkindiktiń mańyzyna toqtalyp, ómirlik tájiribeni kórkem oimen ushtastyrý jáne ulttyq qundylyqtardy ádebiet arqyly jetkizý jóninde keńes berdi.
Sonymen qatar, Ákbar Májit pen Mo Ianǵa «Ál-Farabi atyndaǵy Qazaq Ulttyq Ýniversitetiniń Qurmetti professory» ataǵy tabystaldy. Uiymdastyrýshylardyń aitýynsha, bul sheshim eki el arasyndaǵy ádebi-mádeni bailanysty nyǵaitýǵa jáne qazaq ádebietiniń halyqaralyq keńistiktegi ornyn arttyrýǵa baǵyttalǵan mańyzdy qadam boldy.
Sapar aiasynda Ál-Farabi atyndaǵy QazUÝ-da Mo Iannyń qazaq tiline aýdarylǵan eki kitabynyń tusaýkeseri ótti. Olardyń biri – jazýshynyń eń tanymal týyndylarynyń biri sanalatyn The Garlic Ballads («Sarymsaq jyry») romany. Bul shyǵarma magiialyq realizm elementteri men ótkir áleýmettik máselelerdi kóterýimen erekshelenedi. Romandy qazaq tiline Tólegen Mellat aýdarǵan.
Sondai-aq oqyrman qaýymǵa jazýshynyń esseleri, suhbattary men ádebi tolǵanystary toptastyrylǵan How Are You, Faulkner? («Halińiz qalai, Folkner aǵai?») atty pýblitsistikalyq jinaǵy tanystyryldy. Qazaq tiline Edilbek Dúisen men Álihan Mahash aýdarǵan bul jinaqta avtordyń ádebiet, óner jáne qoǵam týraly kózqarastary qamtylǵan.
Qazaqstan Jazýshylar odaǵynyń málimetinshe, qazaq tilinde jaryq kórgen qos kitap álem ádebietiniń tańdaýly týyndylaryn qazaq oqyrmandaryna jaqyndatyp qana qoimai, Qazaqstan men Qytai arasyndaǵy mádeni-gýmanitarlyq yntymaqtastyqtyń damýyna da serpin beredi.
