Qazaqstandyq tanymal Ninety One toby Koreianyń ulttyq MNET telearnasynda kórsetiletin «I Can See Your Voice» televiziialyq shoýynda jeńiske jetti, dep habarlaidy QazAqparat tilshisi.
«I Can See Your Voice» - tipti án aita almaityndar da jeńiske jetýi múmkin alǵashqy shoý. Shoý tujyrymdamasy da qarapaiym. Árbir epizodta shaqyrylǵan oryndaýshy sarapshylar komandasynyń kómegimen 4 raýnd barysynda shoý qatysýshylarynyń qaisysy án aita almaityndyǵyn anyqtaýy qajet. Epizod sońynda bir ǵana oryndaýshy qalyp, ol arnaiy shaqyrylǵan oryndaýshymen birge án aitýy tiis. Eger jeńimpaz án aityp júrgen ónerpaz bolsa, onda singl jazýǵa múmkindik alady. Al án aita almaityn qatysýshy jeńse, júldege tigilgen 4,5 myń dollarǵa ie bolady.
Qazaqstandyq boiz-ben kastingten sátti ótip, baǵdarlamanyń alty qatysýshysynyń qataryn tolyqtyrdy. Al shaqyrylǵan ártis qyzdardan quralǵan Mamamoo k-pop boldy.
«Tóreshiler Ninety One Ortalyq Aziiadaǵy tanymal top nemese Seýlge bilim alýǵa kelgen qarapaiym stýdentter ekendigin tabýy tiis edi. Ninety One tobynyń ánshileri finalǵa shyǵyp, onda Mamamoo repertýaryndaǵy «Yes I am» kompozitsiiasyn jandy daýysta oryndady. ALEM (Batyrxan Málikov), ACE (Azamat Ashmaqyn) jáne BALA-nyń (Daniiar Qulymshin) daýysy tóreshi qyzdarmen qatar Kim Jong-kook, Leeteuk (Super Junior), Yoo Se-yoon syndy shaqyrylǵan tanymal óner juldyzdaryn tań qaldyrdy», - dedi toptyń prodiýseri Erbolat Bedelhan.
Koreianyń estrada juldyzdary qazaq ánshileriniń korei tilinde taza óner kórsetkenderine riza boldy. Sonymen qatar olar toptyń jetekshi reperi ZAQ-tyń (Dýlat Muhametqaliev) jas belsendi ekendigine jáne Q-pop baǵyty men qazirgi qazaq mýzykasyn jaqtaýshylardyń biri ekendigine tańdanystaryn bildirdi. Shoý aiaqtalǵannan keiin 1 saǵat ótisimen Koreianyń ulttyq Naver (Google balamasy) izdeý júiesinde Ninety One eń kóp suranysqa ie bolǵan sózge ainaldy.
Shoý sońynda Ninety One toby tolyq quramda ózderiniń «Aiyptama» ánin oryndady. Mamamoo men Ninety One dýeti orynǵan án YouTube arnasynda jariialanǵan úsh kúnniń ishinde 500 myń kórilim jinady.
«Qazaqstandyq toptyń shyǵarmashylyǵyna qyzyǵýshylyq kúrt artty. Oǵan barlyq áleýmettik jelilerdegi jazylýshylar sanynyń artýy, sonymen qatar top klipteriniń astyna sheteldik jankúierler qaldyrǵan oń pikirler dálel bola alady. Ninety One birtindep álemdik naryqty baǵyndyryp keledi jáne Koreiadaǵy jeńis onyń alǵashqy baspaldaǵy ǵana», - dedi Erbolat Bedelhan.
