Sońǵy kúnderi áleýmettik jelilerde «sheneýnikterdiń» meshitte aiaqkiimmen túsken sýreti kópshilik arasynda qyzý talqyǵa túsip, daý týdyryp, arty dini dúrdarazdyqqa ulasýda. Onyń ústine osy másele jóninde «Kazislam» portalyndaǵy sarapshylyq blogyma da birqatar azamattar atalmysh jaǵdaiǵa bailanysty pikir bildirip, máseleniń arajigin ajyratyp berińiz dep ótinýde.
Meshitke eshqandai «sheneýnik» elimiz táýelsizdik alǵan jyldardan beri aiaqkiimmen kirip aralaǵan emes. Ylaiym budan keiin de solai bolady. Al, kópshiliktiń talqysyna túsip, daý týdyrǵan sýretke kelsek, ol – meshitke keletin resmi qonaqtarǵa arnalǵan «súiretpe» (tápishke). Shalbardyń balaǵynan shyǵyp turǵan tumsyǵy týflige uqsaǵan súiretpe kózge syrt aiaq kiiimi bolyp kórinýi múmkin. Alaida bul súiretpeler meshittiń ishki tártibi men ádebine, meshit dress-kodyna sai taza kiim bolyp sanalady. Osyǵan uqsaǵan súiretpelerdi meshit qyzmetkerleri de kiedi.
Meshit – jer betinde qulshylyq jasaýǵa arnalǵan qasietti oryn, Allanyń úii. Sondyqtan, árbir musylman balasy qasietti orynnyń qurmetin saqtaýy tiis. Meshitke kelýshiniń kiminiń taza ári ádemi bolýy meshit ádebine jatady. Bul jaiynda Alla Taǵala Quran Kárimde: «Ýa, Adamnyń urpaqtary! Meshitke kelgende ásem kiinińder...», – dep, buiyrǵan (Ál-Aǵraf súresi, 31-aiat). Iaǵni, meshitke kelgende kiimińiz ásem, ártúrli nájis zattardan taza bolýy tiis. Kiimge qatysty eń basty shart – deneni jalańashtamai, kiim kiiý jáne onyń taza bolýy. Al, daý týdyrǵan súiretpeler meshit ishinde qoldanýǵa ǵana arnalǵan nájisten taza kiim bolyp tabylady.
Qurmetti aǵaiyn, Sizderden ótinerim, bir máseleniń baiybyna baryp, aq-qarasyn ajyratyp almaiynsha kóringen kók attynyń (pasyqtardyń) aitqanyna kóńil bólmeseńizder eken. Mundai tyrnaq astynan kir izdep, eldi arandatýshy aqparatpen aldap otyrǵandar bar. Olar ózderin dinge janashyr, taqýa etip kórsetkenimen, teris piǵyly Ibilis malǵunǵa qolshoqpar etýi múmkin. Shariǵat ilimderinde pátýa aitýǵa bilimi de, quqy da joq kisilerdiń aitqanymen júrý aqiqatty izdeýge jatpaidy.
Dál qazirgi ýaqytta ózara qyryq pyshaq bolǵansha, dini ári azamattyq turǵydan paryz bolyp tabylatyn birlik pen berekeni birinshi kezekke qoiyp, islamǵa qatysty kez-kelgen máseleniń jaýabyn tek qana QMDB-dan (múftiiattan) ǵana alǵanymyz abzal.
Ershat OŃǴAROV,
«Kazislam» portalynyń menshikti sarapshysy,
islamtanýshy
