Senat depýtaty Dariǵa Nazarbaeva muǵalimder men dárigerler úshin jeke turǵyn úi baǵdarlamasyn ázirleýdi usyndy, dep habarlaidy Sputnik Qazaqstan tilshisi.
"Muǵalimder men dárigerler úlken azamattyq sektor. Olar búgingi kúni baspanamen qamtamasyz etilý jaǵdaiy boiynsha óte áljýaz bolyp otyr. Ázirge eshbir ipotekalyq baǵdarlama olardyń turǵyn úi máselesin tolyq kólemde sheshe almai keledi", — dedi Dariǵa Nazarbaeva búgin senatta "Nurly jer" baǵdarlamasynyń júzege asyrylý barysy talqylanǵan otyrysta.
Onyń aitýynsha, muǵalimder men dárigerler adami kapitaldy damytýda mańyzdy ról atqarady. Al halyqtyń bul sanatynyń baspana jaǵdaiy qazir qalys qalyp otyrǵan jaiy bar.
"Dáriger men medbike, muǵalim men muǵalimniń materialdyq turǵydaǵy jaǵdaiy birdei emes. Otbasy bar muǵalimder bar, olar, máselen, baǵdarlamaǵa qatysa alady. Mundai múmkindigi joq muǵalimder de bar ǵoi. Olardyń birlese baspana alýǵa bolatyn otbasy joq, tipti keibiriniń moinynda týǵan-týysqandary otyr. Olarǵa qalai kómektesýge bolady? Biz olardy memlekettik jáne azamattyq qyzmetke umtylyp, óz biliktiligin arttyrýǵa yntalandyrýymyz qajet. Sondyqtan olar úshin áskeri qyzmetshiler sekildi jeke baǵdarlama ázirleýdi usynamyn", — dedi Nazarbaeva.
"Qazir baspana máselesi óte ózekti. Jyl saiyn turǵyn úi kólemin arttyryp jatyrmyz, biraq halyq sany da ósip jatyr. Sondyqtan aldaǵy júz jylda baspanaǵa muqtaj halyqtyń bárin qamtamasyz ete almaimyz dep qorqamyn", — degen alańdaýshylyǵyn bildirdi senator.
Aita keteiik, elimizde 2018 jyldyń 1 qańtarynan bastap Qarýly kúshter, áskeri prokýratýra, ulttyq qaýipsizdik jáne ishki ister organdarynyń áskeri qyzmetshilerine arnalǵan jańa turǵyn úi baǵdarlamasy júzege asyrylyp jatyr.
