Jekelegen elderdiń ekonomikalyq sanktsiiasy Eýraziianyń geoekonomikasynyń basty problemasy bolyp otyr. Bul týraly búgin elordada ótip jatqan Astana klýbynyń jalpy otyrysynda QR Prezidenti Nursultan Nazarbaev aitty, dep habarlaidy QazAqparat tilshisi.
«Biz qoldanatyn kommýnikatsiialardyń qaýipsizdigi taǵy da bir mańyzdy syn-tegeýiringe ainalady. Elder úshin tejeýshi faktor jahandaný nátijesinde qalyptasqan tyǵyz ekonomikalyq ózara táýeldilik bolyp sanalady. Degenmen, saýda soǵystary men sanktsiialar bul faktordyń mánin shaiyp jiberedi», - dedi Elbasy.
Qazaqstan Prezidentiniń paiymynsha, aiqynsyzdyq jaǵdaiy barlyq elderdiń jańa «qyrǵi qabaq soǵys» sheginde aýytqyp júrýine májbúrlep otyr. Mundai «soǵys» barlyǵyna tek jeńilis ákeledi.
Memleket basshysy Eýraziianyń geoekonomikasy úshin jekelegen memleketterdiń birjaqty tártippen jáne qarymta jaýap sanktsiiasy retinde engizip otyrǵan ekonomikalyq sanktsiialary mańyzdy problemalardyń birine ainalyp otyrǵanyn basa aitty.
«Úlken Eýraziianyń keibir bólikterinde keń aýqymdy áskeri taitalastyń joǵary varianttylyǵy qalýda», - dedi Nursultan Nazarbaev.
Aita keteiik, Elbasy jiyn barysynda Úlken Eýraziianyń sulbasy qalyptasyp kele jatqanyn aityp, Resei, AQSh jáne Qytai arasyndaǵy geosaiasi básekelestikke alańdaýshylyq tanytty.
Sonymen qatar Nursultan Nazarbaev álemdik derjavalar qarýlaný jarysyna qaita oralýy múmkin ekendigin eskertti.
