Qazaqstan Prezidenti Nursultan Nazarbaev Eýraziialyq ekonomikalyq odaq jumysyna baǵa berdi, dep habarlaidy QazAqparat tilshisi.
«Biz Eýraziialyq ekonomikalyq odaqta ortaq kedendik aýmaq pen birtutas aýqymdy naryq qurdyq. Negizgi salalardaǵy ekonomikalyq saiasatty birlese otyryp úilestiremiz. Integratsiialyq protsester bizdiń memleketterimizdiń ekonomikalyq ósimi qarqynyna aitarlyq úles qosýda. Ony osy jerde Prezident Vladimir Pýtin men Prezident Aleksandr Lýkashenko da aitty. Oǵan strategiialyq salalardaǵy oń dinamika, aýyl sharýashylyǵyndaǵy, ónerkásiptegi ekonomikanyń ósimi septigin tigizip, elder arasyndaǵy syrtqy, sonymen qatar ózara saýdada aitarlyqtai serpilis oryn aldy», - dedi Nursultan Nazarbaev Joǵary Eýraziialyq ekonomikalyq keńestiń kezekti otyrysy barysynda.
Memleket basshysy ótken jyly EAEO-nyń syrtqy ózara saýda kólemi sáikesinshe 24,5-26 paiyzǵa ulǵaiǵandyǵyn eske saldy. Sonymen qatar, Nursultan Nazarbaev oń dinamikanyń aǵymdaǵy jyly da saqtalyp otyrǵandyǵyn basa aitty.
«Bizdiń uiymymyzdyń halyqaralyq bedeli de nyǵaia tústi. Bizben saýda-ekonomikalyq yntymaqtastyqta bolýǵa umtylatyn elderdiń qatary arta túsýde. Tolyqtai alǵanda, qysqa ǵana ýaqyttyń ishinde EAEO aiaǵynan nyq turyp, tolyqqandy integratsiialyq birlestik retinde qalyptasty dep aitýǵa bolady. Búgingi otyrys bizdiń uiymymyzdyń odan ári ósýine jáne damýyna aitarlyqtai óz úlesin qosatyndyǵyna senimdimin», - dedi Qazaqstan Prezidenti.
Aita keteiik, Reseidiń Sochi qalasynda memleket basshylarynyń qatysýymen Joǵary Eýraziialyq ekonomikalyq keńestiń (JEEK) kezekti otyrysy ótýde. Sharaǵa Qazaqstan Prezidenti Nursultan Nazarbaev, Resei basshysy Vladimir Pýtin, Qyrǵyzstan prezidenti Sooronbai Jeenbekov, Belarýs basshysy Aleksandr Lýkashenko jáne Armeniia Premer-Ministri Nikol Pashinian qatysýda. Basqosýda Eýraziialyq ekonomikalyq odaq (EAEO) aiasyndaǵy kópbaǵytty yntymaqtastyqtyń túrli aspektileri, uiymnyń uiymdastyrý-kadrlyq baǵyttaǵy sharalary men aǵymdaǵy jumys barysy sóz bolady dep kútiledi. Kún tártibine 15 másele qoiylǵan. Olardyń ekeýi shaǵyn quramda qaralady.
