Qazaqstan óziniń aldaǵy josparlaryn laiyqty deńgeide iske asyrýǵa qaýqarly. Bul týraly Global Challenges Summit 2018 forýmynda Qazaqstan Prezidenti Nursultan Nazarbaev málim etti, dep habarlaidy "Ult aqparat".
«Men óz sózimde qazirgi atqaryp jatqan jumystarymyz jaiynda, sondai-aq Keńes Odaǵy ydyraǵannan keiin qalai damyǵanymyz týrasynda atap óttim. Keńes Odaǵynda 15 respýblika boldy, sonyń arasynda Qazaqstan 12-13-inshi oryndardyń birinde edi. Reseiden keiin ekinshi orynda Ýkraina turdy. Alaida, búginde ekonomika, damý qarqyny boiynsha ekinshi orynda Qazaqstan tuǵyrlandy. Árine, tiisti qiyndyqtar da bar. Barlyǵy qarqyndy damyp jatyr, biz uzaq jyl osy kúnge daiyndaldyq, osy jolǵa umtyldyq. Bizdiń alternativti indýstriia qurý baǵytyndaǵy jumysymyz, jastardy oqytýǵa talpynysymyz, joǵarý oqý oryndaryn ashýymyz – barlyǵy da búgingi kúnge diyndyq boldy. Sondyqtan Cherchilldiń sózimen aitsaq, "pessimist bárinen tek jamandy izdeidi, al optimist - jaqsyny", men biz, qazaqstandyqtar, optimistpiz dep sanaimyn», - dep toqtaldy Elbasy.
Memleket basshysy shikizattyq resýrstardan ózgeshe balamaly indýstriiany qurý boiynsha jumystar, jastardy oqytýǵa negizdelgen umtylys, osyǵan sáikes JOO-lardy qurý boiynsha talpynystyń barlyǵy búgingi qarqyndy damýǵa daiyndyq bolǵanyn atap ótti.
«Meniń oiymsha, qazaqstandyqtar, iaǵni bizder - optimispiz. 20 jyl tolyp otyrǵan bul jańa qalada millionnan astam adam ómir súrýde. Jalpy Qazaqstandaǵy sekildi osy qaladaǵy turǵyndardyń ortasha jasy - 32-de. Iaǵni biz bolashaqqa úlken optimizmmen qaraimyz», - dedi N. Nazarbaev.
Osy oraida Prezident Qazaqstan óziniń jer kólemi boiynsha álemde toǵyzynshy orynda ekenin eske sala kele, alaida halyq sany men ekonomika kólemi aiasynda aitarlyqtai aýqymdy emestigin sóz etti.
«Alaida Ortalyq Aziiada bizdiń ekonomikanyń kólemi ózge memleketterden artyq. Biz osymen maqtanamyz», - dedi Memleket basshysy.
Sóz sońynda Elbasy Qazaqstanda aldaǵy belesterdi tabysty eńseretinin, osy oraida elimiz jańa tehnologiialardy igergen alpaýyt memleketterdiń qatarynda bolýǵa qaýqarly ekendigin atap ótti.
