Qazaqstan Prezidenti Nursultan Nazarbaev Astanada EXPO-2017 halyqaralyq mamandandyrylǵan kórmesin ashty. Ashylý saltanaty kórme territoriiasyndaǵy Kongress-ortalyqta ótip jatyr, - dep habarlaidy kaz.tengrinews.kz tilshisi.
"Qonaqjai Qazaqstannyń elordasy - ásem Astanaǵa qosh keldińizder! Búgin bizdiń elimizde ǵana emes, dúniejúzilik kórmeler tarihynda aitýly kún. Qazir kópten kútken halyqaralyq EXPO-2017 kórmesiniń shymyldyǵy ashyldy. Osy saltanatty merekemen barshańyzdy shyn júregimnen quttyqtaimyn. Biz EXPO kórmesin TMD jáne Eýropa elderi arasynda tuńǵysh ret ótkizgeli otyrmyz. Sóitip, qazaq eliniń ordasy aitýly kórmeni ótkizgen álemdegi 35-qalanyń qataryna qosyldy. Astana úsh ai boiy búkil adamzattyń jetistikterin áigili etetin basty alańǵa ainalady. Táýelsiz el simvoly - Astana naǵyz HHI ǵasyr qalasy retinde jańa qyrynan tanylatyn bolady", - dedi Nursultan Nazarbaev.
Sondai-aq, Elbasynyń aitýynsha, kórmege álemniń 115 memleketi, 22 halyqaralyq uiymy qatysady. "Men olardyń barlyǵyna halqymyzdyń atynan rizashylyǵymdy bildirip, sáttilik tileimin", - dep alǵys bildirdi QR Prezidenti.
Elbasy Halyqaralyq kórmeler biýrosynyń prezidenti Stin Kristensen (Steen Christensen) myrza, uiymnyń bas hatshysy Visente Lossertaleske alǵys aitty. "Lossertales myrza daiyndyq barysynda birneshe ret Qazaqstanǵa kelip, atsalysty, ókinishke orai, búgin kele almai qaldy. Qurmetti dostar, EXPO osydan 166 jyl buryn ótken tuńǵysh kórmeden beri árdaiym jańa ideialardyń besigi bolyp tabylady. Alǵashqy telefon, atkólik, kompiýter, jer serigi men atom elektrstantsiiasy siiaqty jańalyqtyń barlyǵynyń tusaýy osyndai EXPO-da kesilgen bolatyn. Sol igi úrdisti jalǵastyrǵan Astana álemdik innovatsiialyq ortalyqtyń biri retinde tanylady dep senemin. EXPO ǵylymi jańalyqtar kórmesi ǵana emes, barlyq elder men órkenietterdi jalǵaityn altyn kópir. Qazaqstan kórmeni joǵary deńgeide ótkizý úshin jan-jaqty daiyndaldy. Aldyńǵy qatarly infraqurylym, derbes energiialar júiesi bar EXPO qalashyǵy salyndy. 100-den astam sáýletti ǵimarat boi kóterdi. Astananyń áleýettik damý joly da tyń serpiliske ie boldy. Qalada jańa áýejai, jańa temirjol kokzaly paidalanýǵa berildi. Álemdik deńgeidegi qonaqúiler, mádeni, oiyn-saýyq keshenderi salyndy, ashyldy. Osynyń barlyǵy EXPO-dan keiin de eldiń ortalyq igiligine qyzmet etetin bolady", - dedi Nazarbaev EXPO ashylý saltanatynda.
Shara Memleket basshylarynyń kórmeniń "Nur Álem" ortalyq ekspozitsiiasyndaǵy Qazaqstan pavilonyna kelýinen bastaldy. Memleket basshylarynyń sálemdesýinen keiin kórmeni aralaý men Qazaqstan pavilonymen tanysý júredi. Osydan keiin ózge elderdiń pavilondary tanystyrylady. EXPO-2017 kórmesiniń ashylý saltanatynyń resmi bóligi Kongress-ortalyqta ótti. Odan keiin Amfiteatrda kontserttik baǵdarlama kórsetiledi. Sharanyń sońynda kórermender lazer shoýy men tamasha otshashýdy tamashalai alady.
Transliatsiia barlyq respýblikalyq telearnada tikelei efirden kórsetiledi. Sondai-aq Media Ortalyq 4 túsirilim kóligi arqyly 60 túsirilim ornynan habar taratady.
