Frantsiia jáne Shvetsiianyń táýelsiz zerthanalary reseilik oppozitsiialyq saiasatker Aleksei Navalnyidyń analizin tekserip, nemis mamandarynyń qorytyndysyn rastady. Bul týraly dúisenbi kúni Germaniia úkimeti habarlady. Buǵan deiin Germaniia saiasatkerdiń "Novichok" tobyna jatatyn himiialyq zattan ýlanǵanyn aitqan edi.
"Bir-birine táýelsiz úsh zerthana Navalnyidyń "Novichok" tobyna jatatyn júike júiesin isten shyǵaratyn zattan ýlanǵanyna dálel kórsetti" delingen Germaniia úkimeti taratqan habarlamada.
Onda sonymen birge Navalnyidan alynǵan synama úlgisiniń Himiialyq qarýǵa tyiym salý jónindegi uiym (HQTU) sarapshylaryna berilgeni, HQTU zerthanasynda zertteletini jazylǵan.
"Reseidi ne bolǵanyn túsindirýge taǵy da shaqyramyz. Biz eýropalyq áriptesterimizben tyǵyz bailanysta otyrmyz jáne aldaǵy qadamdardy talqylaimyz" delingen habarlamada.
2 qyrkúiekte Germaniia úkimeti býndesver zerthanasyna súiene otyryp, Navalnyidyń aǵzasynan "Novichok" tobyna jatatyn himiialyq zat qaldyqtary tabyldy jáne oǵan kúmán joq dep málimdegen bolatyn. Germaniianyń syrtqy ister ministri Haiko Maas Resei aldaǵy birneshe kúnde ne bolǵanyn naqty túsindirýi tiis, áitpese Germaniia EO áriptesterimen birge shara qoldaný máselesin talqylaidy degen edi. Maas "Soltústik aǵys-2" jobasyna qatysty shara qoldaný múmkindigin de joqqa shyǵarmaǵan edi.
Derekkózge súiengen Germaniianyń aqparat quraldarynyń jazýynsha, nemis mamandary Navalnyidy Solsberide Sergei Skripalǵa ý bergen kezde qoldanǵan zattan sál basqashalaý "Novichok" túrimen ýlandyrǵan degen qorytyndyǵa kelgen. Germaniianyń barlaý qyzmeti bul iske reseilik arnaiy qyzmettiń qatysy bolmaýy múmkin emes dep topshylaidy.
Resmi Máskeý bir jaǵynan Omby dárigerleri men meditsina salasyndaǵy sheneýnikterdiń tujyrymyna súiene otyryp, Navalnyidyń ýlanǵanyn joqqa shyǵarady. Ekinshi jaǵynan, Resei Germaniiadan Navalnyidyń densaýlyǵy men analizi týraly málimetti berýdi talap etip, Berlin birge zertteýge yqylas tanytpai otyr deidi. Reseidiń ózinde qylmystyq is qozǵalmaǵan.
Reseilik oppozitsioner, Jemqorlyqpen kúres qorynyń jetekshisi 44 jastaǵy Navalnyi 20 tamyz kúni Tomskiden Máskeýge baǵyt alǵan ushaqta jaǵdaiy kúrt nasharlaǵan. Ushaq saiasatker densaýlyǵynyń nasharlaýyna bailanysty Omby qalasyna qonýǵa májbúr bolǵan. Saiasatker Omby aýrýhanasynda eki kún jatty. Ondaǵy dárigerler Navalnyidyń zat almasý protsesi buzylǵan dep málimdedi. Olar "saiasatker ýlandy" degen Navalnyi jaqtastarynyń tujyrymyn joqqa shyǵarǵan.
22 tamyzda týystary men jaqtastarynyń talabymen saiasatker Berlindegi "Sharite" klinikasyna aýystyryldy.
Navalnyidyń jaqtastary saiasatkerge Resei biliginiń nusqaýymen ý bergen dep sanaidy.
Buǵan deiin nemis dárigerleri Navalnyidyń densaýlyǵy jaqsarǵanyn, komadan shyqqanyn habarlaǵan.
