Omby aýrýhanasynyń travmatologiia jáne ortopediia bóliminiń jetekshisi Rýstam Agishev 63 jasynda qaitys boldy, resmi organdar onyń insýlttan qaitqanyn habarlady. Bul týraly "Taiga.info" saity jazdy, dep habarlaidy Azattyq.
Dál osy aýrýhanaǵa byltyr tamyz aiynda Aleksei Navalnyi essiz kúide jetkizilgen. Oppozitsionerdiń jaqtastary aýrýhana ákimshiligi men klinika qyzmetkerleri Navalnyiǵa ne bolǵanyn bildi dep sanaidy. Biraq "joǵarydan kelgen buiryqqa baǵynyp, jalǵan diagnoz qoidy jáne onyń "Novichok" tobyna jatatyn qaýipti zatpen ýlanǵanyn jasyrýǵa tyrysty" dep esepteidi.
Aqparatqa qaraǵanda, Agishev №1 Omby aýrýhanasynda 30 jyl qyzmet istegen. Klinika jeteshisi Evgenii Osipov onyń qazasyn "meditsina qaýymdastyǵy úshin orny tolmas qaza" dep atady.
Keiingi kezde atalǵan aýrýhana basshylyǵyndaǵy adamdar qatary sirei bastaǵan. Aqpan aiynyń basynda klinikanyń bas dárigeriniń orynbasary 55 jastaǵy Sergei Maksimishin "júrek aýrýynan" qaitys bolǵan.
Onyń aldynda bas dárigerdiń taǵy bir orynbasary Anatolii Kalinichenko qyzmetinen ketken. Jekemenshik klinikaǵa ketken dáriger "ákimshilik sharýalardan góri hirýrgiiany kóbirek unatatynyn" aitqan.
Kalinichenko Navalnyidy emdeý, Germaniia dárigerlerimen qarym-qatynas ornatý, BAQ-pen bailanysqa jaýap bergen. Keiinirek jýrnalisterge aqparat berý mindeti mekemeniń bas dárigeri, "Edinaia Rossiia" múshesi Aleksandr Mýrahovskiige júkteldi. Ol aqparat quraldaryna Navalnyidyń "zat almasýy buzylǵan" dep málimdegen. Buǵan qosa, Mýrahovskii eki kún boiy saiasatkerdi Berlinge jiberýge qarsy bolǵan. Keiinirek Mýrahovskii aimaqtyq densaýlyq saqtaý ministrliginiń jetekshisi bolyp taǵaiyndaldy.
Aleksei Navalnyi byltyr 20 tamyzda Tomskiden Máskeýge ushyp bara jatqanda kenetten jaǵdaiy nasharlap, komaǵa túsken. Ol birden Ombydaǵy №1 jedel járdem aýrýhanasyna jetkizilgen. Eki kúnnen soń Germaniiaǵa evakýatsiialanǵan. Saiasatker sol jaqta esin jiyp, 5 ai emdeldi. Eýropadaǵy zerthanalar saiasatkerdiń aǵzasynan sovet kezinen beri bar adamnyń júike júiesin sal qylatyn "Novichok" tobyna jatatyn qaýipti zattyń qaldyqtaryn tapty. Al reseilik dárigerler saiasatkerdiń aǵzasynan ý qaldyqtary tabylmady dep málimdedi.
Arnaiy zertteý júrgizgen Vellingcat toby oppozitsionerdi ýlaýǵa Resei FSB qyzmetkerleri qatysty dep tujyrym jasady. Aleksei Navalnyidyń ózi qastandyqtyń artynda Resei prezidenti Vladimir Pýtin tur dep esepteidi. Kreml barlyq aiyptardy joqqa shyǵarady.
