Shýaqty Naýryz merekesine orai Ortalyq Aziia memleketteriniń basshylary birlesken málimdeme jasady, dep habarlaidy "Ult aqparat" Aqordanyń baspasóz qyzmetine silteme jasap.
***
Biz, Qazaqstan Respýblikasy, Qyrǵyz Respýblikasy, Tájikstan Respýblikasy, Túrikmenstan, Ózbekstan Respýblikasy Prezidentteri Ortalyq Aziia halyqtaryn búkil óńirimizge ortaq Naýryz merekesimen shyn júrekten quttyqtaimyz.
2010 jylǵy 23 aqpanda Birikken Ulttar Uiymy Bas Assambleiasynyń qararymen bul meiram Naýryz – Halyqaralyq kúni dep tanylǵanyn jáne ony IýNESKO-nyń Adamzattyń materialdyq emes mádeni muralary tizimine engizgenin erekshe atap ótemiz.
Óziniń myńjyldyq tarihynda Naýryz meiramy tabiǵattyń jáne qoǵamnyń qaita túleýi men jańarýynyń, adamzat balasynyń rýhani tazarýy men ózin-ózi damytýynyń nyshanyna ainaldy. Osy shýaqty da qasterli mereke amandyqty, birlikti, baýyrlastyq pen ózara qoldaýdy tanytyp, bizdiń elderimizdi biriktiretin barlyq mádeni-tarihi qundylyqtardy dáripteidi. Bul – ortaq ata-babamyzdan qalǵan uly mura. Biz ony saqtaýymyz jáne damytýymyz qajet.
Naýryzdy toilaý kezeńi barlyq zamanda adami jáne otbasylyq qarym-qatynastardyń, dostyq pen tatý kórshilik bailanystardyń nyǵaiýymen, kórshiler arasyndaǵy erekshe qonaqjailylyqtyń kórinis tabýymen qatar kelgen. Bul ortaq tarih, mádeniet, dástúr, turmys arqyly birikken elderimiz úshin qazir de mańyzdy.
Osy meiram qarsańynda búkil óńirimizdiń qaýipsizdigin, turaqtylyǵy men ornyqty damýyn qamtamasyz etý maqsatymen óńirlik yntymaqtastyqqa, ózara qoldaýǵa, ózekti máselelerdi birlesip sheshýge niet bildirýimizdiń zor simvoldyq máni bar.
Ózara tiimdi saýda-ekonomikalyq jáne investitsiialyq yntymaqtastyq, óńirlik tranzit-kólik infraqurylymnyń keńeiýi, sý-energetikalyq, azyq-túlik áleýetterin utymdy igerý, óndiris jáne óńdeý salalaryn damytý, ozyq tehnologiialar men innovatsiialardy qoldaný, tsifrlyq ekonomika jolyndaǵy ilgerileý Ortalyq Aziia elderi ál-aýqatynyń turaqty túrde ósýin qamtamasyz etýge septigin tigizedi.
Biz halyqtarymyzdyń arasyndaǵy ózara qurmet, dostyq pen baýyrlastyq qatynastardy saqtaýǵa jáne nyǵaitýǵa degen tarihi jaýapkershilikti sezine otyryp, mádeniet pen óner, bilim men ǵylym, týrizm jáne sport salalaryndaǵy ózara yqpaldastyqty tereńdetýge shaqyramyz.
Kóktemgi kún men túnniń teńelýi, rýhani tazarý men jańarý merekesiniń qarsańynda Qazaqstan, Qyrǵyzstan, Tájikstan, Túrikmenstan, Ózbekstan halyqtaryna, sondai-aq jer betindegi barsha halyqtarǵa beibitshilik, molshylyq jáne qýanysh tilep, ósip-órkendeýlerine niettestigimizdi bildiremiz.
Naýryz meiramy ár úige amandyq pen baq-bereke ákelsin!
