27 shildede Natasha Qalymbetovanyń anasy ómirden ótti, dep habarlaidy ult.kz.
Bul týraly NemolchiKZ qory habarlady.
“Biz onyń bul aýyr qazany qanshalyqty qiyn qabyldap jatqanyn bilemiz jáne barynsha qoldaý bildirgimiz keledi”, - dep jazdy qor.
Natasha tikelei efirge shyǵyp, júrekti syzdatqan sózder aitty. Ol ómirden ótken anasyna arnap:
«Saǵan esh kináń joq ekenin dáleldegim keldi. Ekeýmiz sol aýylǵa birge baryp, barlyǵyna kinálilerdiń jazalanǵanyn, ádildik bar ekenin kórsetkim keldi. Biraq úlgermedim», – dedi.
Natasha Qalymbetova kim?
Natasha Qalymbetova – osydan 32 jyl buryn toptyq zorlyqtyń qurbany bolǵan qazaqstandyq áiel. Ol 2026 jyly áleýmettik jelide óz oqiǵasyn alǵash ret ashyq aityp, qoǵamda úlken rezonans týdyrdy. Osydan keiin Batys Qazaqstan oblysynyń politsiiasy qylmystyq is qozǵap, kóp jyldan beri jabyq qalǵan oqiǵany qaita tergeýge kiristi.
Natashanyń aitýynsha, 1994 jyly 17 jasynda aýyldaǵy keshten qaityp kele jatqanda ózin tórt er adam kúshtep áketip, zorlaǵan. Oqiǵadan keiin ol júkti bolyp, qyz balany dúniege ákelgen. Alaida túrli jaǵdailarǵa bailanysty sábiinen aiyrylǵan.
32 jyl boiy únsiz kelgen Natasha Qalymbetova bul oqiǵany jariialaýdaǵy maqsaty tek kinálilerdiń jazalanýyna qol jetkizý emes, sonymen qatar zorlyq kórgen áielderdiń kinásiz ekenin dáleldeý ekenin aitty. Onyń sózinshe, jábirlenýshiler emes, qylmyskerler qoǵam aldynda jaýap berýi tiis.
Qazirgi tańda Natasha Qalymbetova ózine qatysty istiń ádil tergelýin talap etip, quqyq qorǵaý organdaryna júginip júr. Sonymen birge ol osydan 30 jyldan astam ýaqyt buryn aiyrylyp qalǵan qyzyn izdeýdi jalǵastyryp keledi. Bul oqiǵa Qazaqstanda áielderge qatysty zorlyq-zombylyq máselesin qaita kóterip, qoǵamda keń talqylanǵan taqyryptardyń birine ainaldy.
