Keshe Qazaqstan Respýblikasynyń Tuńǵysh Prezidenti – Elbasynyń kitaphanasynda «Eýraziia geoekonomikasy: túiisýden yntymaqtastyqqa deiin» taqyrybynda halyqaralyq konferentsiia ótti.
QHR Memlekettik keńesiniń tóraǵasy Li Ketsiannyń elimizge taiaý arada josparlanyp otyrǵan resmi saparynyń qarsańynda uiymdastyrylǵan, qazaqstandyq jáne qytailyq sarapshylar qatysqan bul sharany Qazaqstan Respýblikasynyń Tuńǵysh Prezidenti – Elbasynyń kitaphanasy direktorynyń orynbasary Timýr Shaimergenov ashyp, kirispe sóz sóiledi. Ol jiyn barysynda qarashanyń basynda Qazaqstan Premer-Ministri Baqytjan Saǵyntaev pen QHR Memlekettik keńesiniń tóraǵasy Li Ketsian kezdesetinin aita kelip, búgingi jiynnyń qazaqstandyq diplomattarǵa paidasy zor ekenin jetkizdi.
Budan keiin QHR Qoǵamdyq ǵylymdar akademiiasy Resei, Shyǵys Eýropa jáne Ortalyq Aziiany zertteý institýty (QQǴA) direktorynyń orynbasary Sýn Li «Jibek joly ekonomikalyq beldeýi jáne Eýraziialyq ekonomikalyq odaǵynyń Ortalyq Aziia óńirindegi túiisýiniń basty baǵyttary» taqyrybynda baiandama jasady. Sýn Li óz sózinde Jibek joly ekonomikalyq beldeýi aiasynda yntymaqtastyqty damytýdyń basty baǵyty retinde infraqurylym men energetika salasynyń mańyzdylyǵyna toqtaldy. Sondai-aq, ol Qytai jaǵynyń iskerlik seriktes retinde Qazaqstanǵa qyzyǵýshylyǵy artyp otyrǵanyna nazar aýdardy.
«Qytai – Eýraziialyq ekonomikalyq odaqtyń eń úlken saýda-ekonomika salasyndaǵy seriktesi. Ótken jyly eki jaqtyń taýar ainalymynyń kólemi 78 milliard dollardan astam boldy», – dedi ol.
Óz kezeginde Qazaqstannyń «Jibek joly» halyqaralyq logistika jáne biznes institýty Qamqorshylar keńesiniń múshesi Erhat Esqaliev «Bir beldeý – bir jol» bastamasy ekonomikalyq ósýdiń jahandyq trend retinde. Qazaqstannyń róli» taqyrybynda habarlama jasap, elimiz ben Qytaidyń qarym-qatynasy turǵysynda sóz qozǵady. Onyń aitýynsha, Qazaqstan «Jibek joly» tranzittik jobasy boiynsha barynsha sapaly servis jasaǵany abzal.
«Qazirgi tańda Qazaqstan men Qytaidyń ózara qarym-qatynastary qarqyndy damyp keledi. Naqty jobalar bar. Bul jobalar taraptardyń saýda-ekonomikalyq bailanystaryna tikelei bailanysty.
Qazaqstan Eýropa, Resei jáne Qytai memleketteriniń ekonomikalyq qatynastarynda mańyzdy ról atqarady. Bizdiń elimizdiń tranzittik áleýeti zor. Bul Qazaqstan aýmaǵy arqyly ótkiziletin taýarlardyń kólemin eselep arttyrýǵa múmkindik beredi», – dedi E. Esqaliev.
Odan ári ol «Nurly jol» baǵdarlamasy aiasynda atqarylyp otyrǵan kóptegen sharalar Qazaqstannyń saýda-ekonomika salasyndaǵy áleýetin ósire túskenin sóz etti. Onyń aitýynsha, Qazaqstan óziniń ekonomikalyq kúsh-qýatyn arttyra túsý úshin infraqurylym sapasyna, keden beketterin uiymdastyrýǵa, kólik-logistika salasynyń qyzmetin jetildire túsýge basa nazar aýdarýyn kún tártibinen túsirmeýi tiis.
Jiynda Qytai Qoǵamdyq ǵylymdar akademiiasy «Bir beldeý – bir jol» ortalyǵy basshysynyń orynbasary Chjan Nin Qytai men Eýraziialyq ekonomikalyq odaq arasyndaǵy ekonomikalyq aimaq qurýdyń múmkindikteri jóninde sóz etti. Onyń aitýynsha, ekijaqty qarym-qatynastardyń teń dárejede júrýine jiti kóńil bólý taraptardyń ózara yntymaqtastyǵyn damyta túsedi.
Al Qytai Qoǵamdyq ǵylymdar akademiiasy Resei saiasaty jáne QQǴA qoǵamy bóliminiń basshysy Pan Dapen Eýraziialyq ekonomikalyq odaq pen Jibek joly ekonomikalyq beldeýi arasyndaǵy yntymaqtastyqtyń óristeýi kóptegen múmkindikterge jol ashatynyn jetkizdi.
Sonymen birge, konferentsiia barysynda qatysýshylar qarastyrylǵan taqyryp tóńireginde pikir almasty. Olardyń sózderine qaraǵanda, Qazaqstan men Qytai arasyndaǵy saýda-ekonomikalyq bailanystar eki eldiń ózara yntymaqtastyǵyn odan ári nyǵaita túsedi.
Joldybai BAZAR,
«Egemen Qazaqstan»
.jpeg)