Búgin «Qazmedia» ortalyǵynda QR Aqparat jáne kommýnikatsiialar ministrligi alqa májilisiniń keńeitilgen otyrysynda qoǵam qairatkeri Myrzatai Joldasbekov halyq nazaryna usynylatyn óner týyndylarynyń sapasyn synap, kórermenniń talǵamy taiazdanyp bara jatqanyn aitty, dep habarlaidy "Ult aqparat" Baq.kz portalyna silteme jasap.
«1972 jyly Ǵabiden Mustafin 70 jasqa toldy. Sóitip, maǵan bir tapsyrma berilip, «Qazaqstan» televideniesinde Ǵabiden aǵamdy qasyma alyp, 1 saǵat 15 minýt habar júrgizdim. Sonda aǵamyzdyń «Shyraqtarym, biz ultshyldyqpen alystyq, sender endi ultsyzdyqpen kúresesińder!» degen sózderi qulaǵymda qalypty. Bul óte tereń sóz. Biz qansha damydyq dep, kókirek kerip, maqtanǵanymyzbenen, ulttyń tarihyn, qasietin, dástúrin, ádet-ǵurpyn saqtai almasaq, onda bul memleket kimdiki bolmaq?», - dedi jiyn barysynda sóz alǵan Myrzatai aǵa.
Osy oraida ol ulttyq qundylyqtarymyzdy nasihattaý Aqparat jáne kommýnikatsiia ministrligine júktelgen úlken mindet ekenin alǵa tartty. Jáne olardyń ekrandarymyzdan, efirlerimizden shettetilýi kórermen talǵamyn tómendetetinin bas aitty.
«Jasyryp-jabatyny joq, keiingi kezderi osy qundylyqtarymyzdyń ózi ekrandarymyzdan, efirlerimizden shetteńkirep qalyp jatyr. Munyń ornyna, keide estigende qarnym ashady, keshegi Maǵjannyń, Iliiastyń, asqaq Qasym Amanjolov syndy aǵalarymyzdyń óleńderinen góri, Aqan seri men Birjannyń ánderinen góri, halyqtyń asyl ánderinen góri, miiaýlaǵan, adam ne sózin, ne ánin túsinbeitin ánderdiń qaptap kele jatqany meni qatty oilandyrady», - dedi qoǵam qairatkeri.
