Mysyr Arab Respýblikasy (MAR) Parlamentinde Qazaqstan Elshisi Arman Isaǵalievpen ótken kezdesý barysynda Ýaqyptar ministri Muhtar Djýmaa Kairdegi Sultan Beibarys meshitin qalpyna keltirý úshin Mysyr Úkimeti 181 million fýnt (iaǵni, 10,5 million AQSh dollary) bólgenin jariialady, dep habarlaidy Syrtqy ister ministrliginiń baspasóz qyzmeti.
«Buǵan qosa, Ýaqyptar ministrligi óz qarajatynan bul jobany tez aiaqtaý maqsatynda qosymsha 10 million fýnt bergenin basyp aitty. Bul jańalyq Qazaqstan men Mysyr arasyndaǵy tarihi bailanystyń rámizine ainalǵan qazaq dalasynyń perzenti Sultan Beibarystyń murasyn jańǵyrtý jumystary kóp uzamai aiaqtalady degen senim uialatady» delingen habarlamada.
2007 jylǵy 28 qazanda QR men MAR úkimetteri arasynda qol qoiylǵan kelisim negizinde atalǵan meshitti restavratsiialaý jobasy jáne onyń 12,0 mln AQSh dollary mólsherinde biýdjeti bekitilgen edi. Kelisimge sáikes, atalǵan somanyń 4,5 mln AQSh dollaryn Qazaqstan tarapy bóldi, al qalǵan bóligin Mysyr úkimeti qarjylandyrýy tiis edi. Joba 2011 jyldyń qazanynda aiaqtalýy kerek bolǵan, alaida Mysyrdaǵy sol kezde bolǵan saiasi jáne ekonomikalyq daǵdarys sebebimen toqtap qalǵan edi.
2018 jylǵy qazan aiynda, iaǵni 7 jyldan soń, Sultan Beibarys meshitiniń restavratsiialaý jumystary qaita bastaldy. Joba MAR Kóne eskertkishter ministrligi jáne bas merdiger «Arab kontraktors» kompaniiasy iske asyrady. Meshittiń shańyraqty bólmeleri, dálizi, kúmbezi, munaralary qaita kóterilip, ortalyq alań men syrtqy qabyrǵalary jóndeý jumystary júrgiziledi. Jobanyń tehnikalyq baqylaýyn mysyrlyq arheologtar men tarihi sáýletshilerden qurylǵan arnaiy komissiia tekseredi.
Kólemi boiynsha Mysyrda ekinshi orynda turǵan bul meshit qalpyna keltirilgennen keiin eldegi eń tanymal tarihi jáne týristik ortalyqtardyń birine ainalatynyna kúmán joq.
