Jambyl oblysynyń mamandandyrylǵan qylmystyq ister boiynsha sotynda "TuranÁlem banktiń" basshysy Erjan Tátishevtiń qazasy boiynsha ótip jatqan sotta biznesmen Murathan Toqmádige úkim oqyldy. Sýdia Azamat Tilepov Murathan Toqmádidi Erjan Tátishevti óltirdi dep aiyptap, 10 jyl alty aiǵa sottady. Tengrinews.kz saitynyń habarlaýynsha, sýdia Toqmádige jazasyn qatań rejimdegi koloniiada óteý týraly úkim kesken. Sot úkimine 15 kún ishinde shaǵymdanýǵa bolady.
Buǵan deiin prokýror Toqmádidi "kisi óltirý" baby boiynsha aiypty dep tanyp, 11,5 jylǵa sottaýdy, buǵan deiin kesilgen jazany qosyp, barlyǵy 12 jyl bas bostandyǵynan aiyrý jazasyn kesýdi suraǵan edi.
Al Toqmádidiń advokaty onyń qylmysty "óz ómiri men jaqyn týystarynyń ómiri úshin qaýiptengennen" jasaǵanyn, "kinásin moiyndap, tergeýge bolysqanyn" aityp, jazasyn barynsha jeńildetýdi suraǵan.
Toqmádi taǵylǵan aiyptarmen "kelisetinin", "kámeletke tolmaǵan balalary baryn eskerýdi jáne protsessýaldyq kelisim jasasqanyn" aityp, jeńil jaza taǵaiyndaýdy ótingen.
Naýryzdyń 8-i kúni keshke Murathan Toqmádidiń "Jambyl oblystyq aýrýhanasynan qashyp ketkeni" habarlanǵan edi. 9 naýryz kúni UQK Toqmádidiń ustalǵanyn málimdegen.
Tergeý boljamy boiynsha, Toqmádige adam óltirýge tapsyrysty Tátishev qazaǵa ushyraǵan soń birneshe aidan keiin "TuranÁlem bank" basshylyǵyna kelgen Muhtar Ábliazov bergen delinedi. 2009 jyly BTA bankti (burynǵy "TuranÁlem bank") memleket qaramaǵyna alǵannan keiin shetelge ketip qalǵan oppozitsiialyq tulǵa, burynǵy bankir Muhtar Ábliazov bul aiyptaýlardy "shylǵi ótirik" dep atap joqqa shyǵarady jáne ózin Qazaqstan prezidenti Nursultan Nazarbaev saiasi sebeppen qýǵyndap jatyr dep sanaidy. Ábliazov ózin "bankten milliardtaǵan dollar urlaǵan" dep syrttai 20 jylǵa sottaǵanQazaqstan biliginiń taqqan aiybyn da teriske shyǵaryp, prezident Nazarbaevty únemi synap keledi.
2017 jylǵy kúzge deiin Erjan Tátishevtiń qazasy sol kezde júrgizilgen resmi tergeý qorytyndysy negizinde "ańshylyq kezindegi jazataiym oqiǵa" dep sanalyp kelgen. Al byltyr jazda áýeli tutqyndalyp, keiin biznes-áriptesinen "aqsha bopsalaǵan" jáne "zańsyz qarý saqtaǵan" degen aiyptar boiynsha úsh jylǵa sottalǵan soń túrmede otyrǵan Toqmádidiń osydan 13 jyl burynǵy "tapsyryspen adam óltirý" qylmysyn moinyna alǵany týraly aqparat taraǵan. Respýblikalyq telearna efirinen berilgen filmde Toqmádi Tátishevtiń qazasy "qasaqana jasalǵan qylmys ekenin moiyndaityny" týraly málimdeme jasaǵan. Keiin Qazaqstan biligi "baiqaýsyzda adam óltirip alý" týraly is boiynsha shyǵarylǵan úkimniń kúshin joiyp, jańadan tergeý bastaǵan.
