Foto: facebook.com/QazaqstanHalqyna
Májilis depýtaty Murat Ábenov bankterdi azamattardyń jeke derekterin zańsyz paidalanyp otyr dep aiyptady. Ol elektrondy úkimet júiesi arqyly qarjy uiymdary azamattardyń kelisiminsiz nesie rásimdei alady degen ýáj aitty. Depýtattyń pikirinshe, bank alaiaqtyǵynyń basym bóligi sheteldik qylmyskerlerden emes, qarjy uiymdarynyń óz ishinen shyǵyp otyr. Bul týraly Ult.kz habarlaidy.
«Bankterge azamattardyń jeke derekterin urlaýdyń da qajeti joq. Baǵdat Mýsin ne istep ketti?! Kaspi bankti tikelei elektrondy úkimetke kirgizip ketti. Ashyqtan ashyq kúnde kiredi de, bizdiń derekterdi paidalanyp otyr (bankter, red). Mysaly Kaspi bank-tiń qosymshasyn ashyp kórińiz, ózińizdiń jeke qujatyńyzdy alasyz. Biraq jeke qujatyńyzdy alǵan kezde sizge «sizdiń jeke derekterińizdi bireý alyp jatyr» degen habarlama kele me? Kelmeidi. Sonda nege olai jasap qoiǵan? Osylai kóp bankterge jeke derekterge kirýge ruqsat berip qoiǵan. Men bir ózgeris jasatqyzdym qazir. Kez kelgen nesie alýdy Ulttyq bank arqyly jasaimyz, sebebi elektrondy úkimetke senbeimin.
Jaqynda bir azamattan aryz-shaǵym keldi. «Maǵan Kaspi ban nesie tirkegen, biraq men oǵan mámile bergen joqpyn, Ulttyq bankke barsam nesie maquldaýdan ótpegen» deidi. Iaǵni elektrondy úkimetke tikelei kirip nesie rásimdep alyp otyr. Oǵan kim ruqsat berdi?
Sondyqtan 90 paiyz bank alaiaqtyǵy banktiń óz ishinde. Sebebi qalai bank meniń ruqsatymsyz elektrondy qol qoiady? Meniń ornyma kelisimshart jasaidy, biraq men ózim ol kelisimshartty kórgen joqpyn. Meniń ailyǵym jetpese de 800 myń ailyǵy bar dep jazyp qoiady. Ony kim jasaidy? Sosyn nesie túsken sátte 15 minýttyń ishinde basqa shotqa jiberedi. Bank jasamai kim jasaidy ony? Ýkraina men Reseide otyrǵan alaiaqtar jasai almaidy ony. Banktiń ishinde satqyndar otyr. Qylmyskerler sonyń ishinde otyr. Shet memleketterde aqsha urlansa nesie rásimdelgen adam emes, bank ózi sottasyp, alaiaqty ózi izdeidi eken. Bizge de solai jasaýymyz kerek. Urlanǵan aqsha ‒ banktiń aiyby. Bank ózi izdesin, ózi sottassyn. Kelesize osy ózgeristerge biz jetkizemiz», ‒ dedi Murat Ábenov jýrnalisterge bergen suhbatynda.
Aita keteiik, Qazaqstannyń Bas prokýratýrasynyń málimeti boiynsha biyl alaiaqtar 6,1 myńnan astam azamatty aldaǵan.
