Resei men Ýkraina arasyndaǵy shielenis Qazaqstannyń munai eksportyna qalai áser etedi? QR Parlament Senatynda ótken dóńgelek ústelden keiin BAQ ókilderi Energetika ministri Bolat Aqsholaqovqa osyndai suraq qoidy, dep habarlaidy QazAqparat.
«Qazirgi tańda bul másele anyq emes. Búginde bizdiń munaidyń kóbi Kaspii qubyr kortsortsiýmy arqyly ótedi jáne Qytaiǵa esporttap jatyrmyz. Onyń bárin naqty jaǵdailarda qarastyrý kerek. Dál qazir aiqyn áser etip jatqan eshteńe joq», - dedi ministr.
Onyń aitýynsha, Qazaqstannan eksporttalatyn munai eki qubyr arqyly ótedi.
«Atyraý-Samar dálizi boiynsha taza Reseidiń «Transneft» kompaniiasy arqyly ótetin eksport bar. Onyń kólemi sonsha kóp emes – 15 mln tonna shamasynda. Eń kóp eksport Kaspii qubyr kontsortsiýmy arqyly ótedi – 53-55 mln tonna. Búkil munaidy basqa baǵyttarǵa aýdarý degen tehnikalyq jaǵynan qiyndaý», - dedi Bolat Aqsholaqov.
Vedomstvo basshysy eki eldiń arasyndaǵy jaǵdaidyń ýshyǵýyna bailanysty qazaqstandyq munai eksporttaýshylardyń nege basqa baǵyttardy pysyqtamaǵany týraly da pikir bildirdi.
«Negizgi munai eksporty Kaspii qubyry arqyly ótetindikten baǵytty aýystyrý qiyn. Óitkeni ol teńiz joly emes, qubyr ǵoi. Teńiz arqyly Kavkazǵa, Iranǵa jetkizýge bolady. Biraq ondaǵy kemelerdiń qýaty shekteýli. Sol sebepti muny jan-jaqty qaraý kerek. Qazirgi ýaqytta eshqandai áseri joq. Munai tasymaly toqtaǵan joq», - dedi Energetika ministri.
