Foto: belhope.ru
Almatyda Pediatriia jáne balalar hirýrgiiasy ǵylymi ortalyǵynyń pýlmonologiia bóliminiń 60 jyldyǵy aiasynda «Mýkovistsidozben aýyratyn naýqastardy diagnostikalaýdyń, emdeýdiń jáne ońaltýdyń zamanaýi aspektileri» taqyrybynda sheberlik saǵaty ótti, - dep habarlaidy «Ult aqparat».
Pediatriia jáne balalar hirýrgiiasy ǵylymi ortalyǵy men QR Pediatrlar Odaǵynyń uiymdastyrýymen ótken sharaǵa elimizdiń ár óńirinen 80-nen asa mamandar: pýlmonologtar, pediatrlar, dietologtar, gastroenterologtar, fizioterapevt-dárigerler, rezidentter, meditsinalyq JOO stýdentteri, sonymen qatar, Qazaqstan respýblikasynyń barlyq aimaqtarynan sirek (orfandyq) aýrýlar boiynsha óńirlik úilestirýshileri men ár oblystyń Densaýlyq saqtaý basqarmalarynyń ókilderi qatysty.
Sharany ótkizýdegi basty maqsat – QR dárigerleriniń biliktiligin arttyrý, tájiribe almasý jáne meditsinalyq qoǵamdastyqty mýkovistsidoz máselelerine nazar aýdartý.
Mýkovistsidoz - bul syrtqy sekretsiia bezderiniń, sondai-aq ómirlik mańyzdy músheler men júielerdiń: tynys alý joldarynyń, asqazan-ishek joldarynyń, uiqy beziniń, baýyrdyń, silekei jáne ter bezderiniń jáne reprodýktivti júiesiniń zaqymdalýymen sipattalatyn mýltijúieli, tuqym qýalaityn, ómirge qaýip tóndiretin aýrý.
Sheberlik saǵatty Reseidiń jetekshi dárigerleri: m.ǵ.d., professor, «N.P.Bochkov atyndaǵy MGǴO» FMBǴM-niń genetikalyq epidemiologiia zerthanasynyń bas ǵylymi qyzmetkeri Natalia Kashirskaia, Resei Densaýlyq saqtaý ministrliginiń «Ulttyq meditsinalyq balalar densaýlyǵyn zertteý ortalyǵy» FMAM-nyń bilikti mamandary: m.ǵ.d., molekýlalyq mikrobiologiia zerthanasynyń meńgerýshisi, mikrobiolog Anna Lazareva, m.ǵ.d., professor, joǵary sanatty pýlmonolog dáriger, pýlmonologiia bóliminiń meńgerýshisi Olga Simonova, m.ǵ.k., pediatr, nýtritsiolog Inna Sokolov, m.ǵ.d., endoskopiialyq zertteýler bóliminiń meńgerýshisi Maksim Lohmatov ótkizdi.
Is-sharanyń ashylýynda Pediatriia jáne balalar hirýrgiiasy ǵylymi ortalyǵynyń Direktorlar keńesiniń tóraiymy Mariiam Omarova mýkovistsidozǵa arnalǵan sheberlik saǵaty bizdiń elimizdegi kúrdeli aýrýlardyń biri sanalatyn dertti diagnostikalaý, emdeý jáne ońaltýdy jaqsartýda taǵy bir qadam jasaýǵa múmkindik beretinin atap ótti.
«Búgingi shara Ortalyqtyń pýlmonologiia bóliminiń 60 jyldyq mereitoiyna arnalýymen mańyzdy. Bólimniń qurylýy men damýyna akademik Kamal Sárýaruly Ormantaev, prof. Omarova Kúlán Omarqyzy, prof. Baijanova Mýnira Maievna jáne basqa da mamandar úlken úles qosty. Pýlmonologiia bóliminiń birinshi meńgerýshisi Ten Olga Denisovna boldy. Bólimde qurylǵannan beri mýkovistsidozben aýyratyn balalarǵa erekshe kóńil bólinedi. Jyldan-jylǵa gendik aýrýlardy anyqtaý jaqsaryp keledi. Jańa emdeý tehnologiialaryn engizýdiń arqasynda naýqastardyń ómir súrý sapasy jaqsaryp, ómir súrý uzaqtyǵy artty. Eger buryn mýkovistsidozdy balalyq shaq kezdegi aýrý dep sanalsa, qazirgi tańda bul dertke shaldyqqan balalar eresek jasqa jetip, ómir jastary uzarýda», dep atap ótti Mariiam Omarova.
«Jyl saiyn aýrýhanada ártúrli bronh-ókpe patologiiasy bar 600-den astam balaǵa kómek kórsetiledi, 200-den astam telemeditsinalyq keńester júrgiziledi. Bizdiń mamandar elimizdiń barlyq aimaǵynda sheberlik sabaqtar, meditsinalyq, konsýltativtik, ádistemelik kómek kórsetip keledi. Emdeý-diagnostikalyq jumystar halyqaralyq standarttarǵa sai joǵary deńgeide júrgizilýde. Pýlmonologiia bólimi búginde jas mamandardy daiyndaityn jaqsy mektep bolyp tabylady, al bizdiń Ortalyq respýblika boiynsha balalar pýlmonologtaryn daiyndaityn bazaǵa ainaldy. Búgingi shara osy salany damytýǵa, kórkeitýge óz úlesin qosady dep senemin», dedi alǵy sózinde «Pediatriia jáne balalar hirýrgiiasy ǵylymi ortalyǵy» AQ Basqarma tóraǵasynyń ǵylymi-innovatsiialyq qyzmetter jónindegi orynbasary Liazat Manjýova.
Eki kún boiy ótken sharada reseilik mamandar qazaqtandyq dárigerlerge oqytý seminarymen qatar, praktikalyq dárister ótkizip, gendik aýrýlardy emdeý boiynsha tájiribelerimen bólisti. Atap aitqanda, mýkovistsidozdy emdeý men diagnostikalaý, ókpe asqynýlary, fizioterapiia men targetti terapiia, durys tamaqtaný jáne mýkovistsidozǵa shaldyqqan balalarǵa durys kútim jasaý boiynsha keńesterin berdi. Sheberlik saǵattyń ekinshi kúni mamandar ortalyqtaǵy jáne aimaqtardan kelgen mýkovistsidozben aýyratyn balalardy qarap (6 bala), ári qaraiǵy emdeý is-sharalaryn birge talqylady.
Búgingi kúni Qazaqstanda resmi túrde mýkovistsidozǵa shaldyqqan 173 naýqas tirkelgen. Sirek kezdesetin orfandyq aýrýlar – bul múgedektikke, ómirdiń qysqarýyna alyp kelýi múmkin sozylmaly kúrdeli nemese ómirge qaýipti aýrýlar. Búgingi kúni sirek kezdesetin aýrýlardyń 7000-nan astam túri belgili. Kóp jaǵdaida bul genetikalyq aýrý, alaida sirek kezdesetin aýrýlar arasynda infektsiialyq, aýtoimmýndyq nemese ýytty sipattaǵy aýrýdyń túrleri de bar. Ókinishke orai, kóptegen sirek aýrýlardyń paida bolý sebepteri belgisiz bolyp qalýda. Aýrýdyń belgileri týa sala nemese júre kele bilinýi múmkin. Óitkeni, sirek aýrýlardyń kópshiligi basqa aýrýlardyń belgisi túrindi bilinedi.
