Ulan-Batyrda Qazaqstannyń Táýelsizdik kúnine arnalǵan saltanatty qabyldaý ótti, dep habarlaidy "Ult aqparat" Mońǵoliiadaǵy Qazaqstan elshiligine silteme jasap.
Saltanatty is-sharaǵa Mońǵoliia Úkimetiniń músheleri, Parlament depýtattary, Ulan-Batyrda akkredittelgen shetel diplomatiialyq ókildikteri men halyqaralyq uiymdardyń basshylary, kórnekti qoǵamdyq qairatkerler, ǵylym men mádeniet qairatkerleri, sondai-aq qazaq diasporasynyń jáne jergilikti BAQ ókilderi qatysty.
«Sharany ashqan elshi Jalǵas Ádilbaev Qazaqstannyń táýelsizdik jyldarynda qol jetkizgen jetistikteri men onyń bai murasy jóninde baiandady. Elshi sondai-aq, Qazaqstan óziniń kópjaqty jáne beibit syrtqy saiasatymen, saiasi turaqtylyǵymen, halyqtar dostyǵymen jáne qarqyndy damyp jatqan ekonomikasymen álemge áigili ekenin atap ótti» delingen habarlamada.
Jalǵas Ádilbaev ekijaqty yntymaqtastyqtyń damýyna jańa serpilis bergen Mońǵoliianyń Premer-Ministri Ý.Húrelsúhtyń Qazaqstanǵa resmi saparyn erekshe atap ótti.
Bas qonaq retinde qatysqan Mońǵoliianyń Syrtqy qatynastar ministri D.Tsogtbaatar óz sózinde qazaqstandyq-mońǵol qatynastarynyń damýyna jáne Qazaqstannyń halyqaralyq sahnadaǵy tyń bastamalarynyń júzege asyrylýyn joǵary baǵalady. Sóz sońynda Mońǵoliianyń syrtqy saiasat vedomstvosynyń basshysy eki memlekettiń arasyndaǵy qatynastardyń odan ári jan-jaqty damýyna senim bildirdi.
Meimandardyń nazaryna Qazaqstan týraly beinefilm men fotokórme, sondai-aq qazaq diasporasynyń ókilderi oryndaýynda ulttyq áýender usynyldy.
