Qazaqstandyq ánshi Móldir Muqanova týǵan aýylyna baryp, balalyq shaǵynyń jyly estelikterimen bólisti. Óner iesi áleýmettik jelidegi paraqshasynda aýyldaǵy tynys-tirshilikti kórsetetin beinejazba jariialady, dep habarlaidy ult.kz.
Ánshiniń aitýynsha, aýyldyń qarapaiym ómiri men tabiǵi taǵamdarynyń dámin qatty saǵynǵan. Ol ózenge shomylyp kelgennen keiin ystyq shai iship, sary irimshikti suiyq qaimaqqa aralastyryp jegen kúnderin erekshe yqylaspen eske alǵan.
Sonymen qatar, Móldir Muqanova tabiǵi sút, qaimaq pen qurttyń artynda úlken eńbek, shydamdylyq jáne mal sharýashylyǵyna degen jaýapkershilik jatqanyn atap ótti.
Óner iesi anasynyń janynda júrip siyr saýyp, sút tartqan kúnderin saǵynyshpen eske alǵanyn jasyrmady.
«Ózenge túsip kelip daiyn shai ishetin, sary irimshikti suiyq qaimaqqa aralastyryp jeitin jaqtamyn.
Sút, qaimaq, qurttyń dámin-ai. Artynda úlken eńbek, turaqtylyq, mal sharýashylyǵyna uqyptylyq jatyr.Anamnyń janynda júrip siyr saýyp, sút tartqanymdy da saǵynyppyn. Saǵynyshymdy osylai erkelep júrip basyp aldym, raqmet saǵan aýylym», – dep jazdy ánshi.
Sondai-aq ol anasynyń árbir is-áreketi ózine úlgi ekenin aityp, «Anańa tartqansyń» degen sózdi eń úlken maqtaý sanaitynyn jetkizdi.
Móldir Muqanova aýylda mazdap janǵan ottyń basynda baýyrsaq pisirip, balalyq shaǵy men anasynyń meiirimin saǵynyshpen eske alǵanyn aityp, ár shańyraqqa bereke men molshylyq tiledi.
Jeli qoldanýshylary ánshiniń qarapaiymdylyǵy men aýylǵa degen yqylasyna oń baǵasyn berip, «Aýylǵa kelin bolatyn jan eken», «Naǵyz qazaq qyzy», «Aýyldyń tárbiesi kórinip tur» degen pikirlerin qaldyrdy.
