QR Densaýlyq saqtaý vitse-ministri Lázzat Aqtaeva Astanada belgisiz shoktan júregi toqtap qalǵan áieldiń ólimine qatysty oqiǵaǵa túsinik berdi, dep habarlaidy QazAqparat.
«Jaqynda olar qala syrtyna saparlaǵan kórinedi, sol kezde ony bir jándik shaǵyp alǵan. Kóziniń mańynda isik paida bolǵannan keiin, ol birinshi qalalyq aýrýhanaǵa bardy. Algoritmge sáikes, dáriger allergiiaǵa qarsy preparattardy bergen. Sáikesinshe, osy preparattardy berý kezinde shoktyń belgileri baiqalǵan. Osy oraida naýqas ókpeni jasandy jeldetý apparatyna aýystyryldy. Bul jaǵdai saldarynan júrek toqtap, reanimatsiialyq áreketter nátije bermedi», - dedi vitse-ministr tilshilerge bergen suhbatynda.
Onyń sózine qaraǵanda, meditsinalyq kezekshilik brigada birden jedel brigadany shaqyrtqan.
«Sáikesinshe, taldaý sharalary sot-meditsinalyq saraptamada júrgiziledi. Qazirgi kezdegi qorytyndy - ol naqtylanbaǵan shok. Endi basqa da tereńdetilgen zertteýler júrgiziledi. Osynyń nátijesinde atalǵan qaiǵyly oqiǵa boiynsha naqty qorytyndy shyǵarylady», - dedi L. Aqtaeva.
Sonymen qatar vitse-ministr meditsinalyq rásimder kezinde kez kelgen áreketterge jazbasha kelisim beriletinin atap ótti.
Onyń aitýynsha, atalǵan oqiǵa boiynsha kelisim bolǵanyn nemese bolmaǵanyn anyqtaý qajet.
«Bul turǵyda meditsinalyq qujatnamaǵa taldaý jasaý kerek, sebebi kelisim naýqastyń ózinen alynady. Eger de emdelýshi kámeletke tolmaǵan jaǵdaida ǵana, kelisimdi ata-anasy beredi», - dedi ol.
Esterińizge sala keteiik, atalǵan áieldiń aýrýhanada kóz jumǵany týraly onyń qurbysy Feisbýktegi paraqshasynda jazǵan bolatyn. Onyń atap ótýinshe, 28 jastaǵy Maqpal Espenbetova elordadaǵy birinshi qalalyq aýrýhananyń kómegine júgingen.
