QR Oqý-aǵartý ministrliginiń Balalardyń quqyqtaryn qorǵaý komiteti bes balany elge qaitardy. Elimizdiń kámeletke tolmaǵan azamattary Qyrǵyzstanda zańsyz júrgen, dep habarlaidy "Ult aqparat" vedomstvonyń baspasóz qyzmetine silteme jasap.
2022 jyldyń basynan beri Qyrǵyz Respýblikasynan 3 qyz jáne 2 ul elge qaitarylǵan.
«Balalardyń quqyqtaryn qorǵaý komiteti balalardyń múddesi úshin aýqymdy jumys atqaryp jatyr. 2022 jyldyń basynan beri QR Oqý-aǵartý ministrliginiń Balalardyń quqyqtaryn qorǵaý komiteti Qyrǵyz Respýblikasynyń aýmaǵynan barlyǵy 5 kámeletke tolmaǵan balany, sonyń ishinde 3 qyz jáne 2 ul balany elge qaitardy. 2011 jyly týǵan qyz Qyrǵyzstannyń Panfilov aýdanynda zańsyz bolǵan. Qolda bar aqparatqa sáikes, balanyń anasy kórshi memleketke baryp, qyzyn tárbieleýge tiisti qujattardy resimdemei, beitanys adamdarǵa tapsyrǵan. Bala jaqyn týysynyń ótinishi boiynsha Qazaqstanǵa qaitaryldy. Sondai-aq 2009 jáne 2011 jyldary týǵan ápkesi men inisi Bishkekte bolǵan. Qazaqstan Respýblikasy men Qyrǵyz Respýblikasynyń memlekettik organdary arqyly balalardy elge qaitarý qajettiligi týraly ótinish kelip tústi. Taǵy bir jaǵdai 2010 jáne 2015 jyly týǵan aǵasy men qaryndasy Qyrǵyz Respýblikasynyń Osh oblysynyń Qara-Sýi aýdanynda bolǵan. Balalar týystarynda zańsyz bolǵan jáne olar anasynyń ótinishi boiynsha elge qaitaryldy, – dedi QR Oqý-aǵartý vitse-ministri Ǵani Beisembaev.
Is-shara barysynda kámeletke tolmaǵannyń barlyǵy Almaty qalasyndaǵy Balalardy qoldaý ortalyǵyna jetkizildi. Qazirgi ýaqytta qoldanystaǵy zańnamaǵa sáikes balalardy týystaryna berý jumystary aiaqtaldy/nemese júrgizilip jatyr.
QR Oqý-aǵartý ministrliginiń Balalardyń quqyqtaryn qorǵaý komiteti Táýelsiz Memleketter Dostastyǵyna qatysýshy memleketter arasyndaǵy kámeletke tolmaǵandardy turaqty turatyn memleketterine qaitarý máseleleri boiynsha yntymaqtastyq týraly kelisimge sáikes ata-anasynyń nemese zańdy ókilderiniń ótinishi boiynsha balalardy qaitarýǵa qoldaý kórsetedi.
Qazaqstan Respýblikasy azamattarynan taǵy ótinishter túsken jaǵdaida mundai jumystar jalǵasyn tappaq.
