Qazaqstan saýda jáne integratsiia ministrliginiń tutynýshylardyń quqyqtaryn qorǵaý komiteti 31 qańtarda Nur-Sultan qalasy sotyna "Bek Air" áýe kompaniiasynyń ústinen tutynýshylardyń quqyqtaryn buzý týraly talap aryz berdi. Bul týraly Saýda jáne integratsiia ministrliginiń baspasóz qyzmetine silteme jasap, jergilikti birqatar basylym habarlady.
Talap aryzda ushaq apatynan keiin qyzmetiniń toqtatylýyna bailanysty "Bek Air" áýe kompaniiasy buǵan deiin satyp alynǵan "ushaq biletteriniń aqshasyn ýaqytynda qaitarmai, tutynýshynyń quqyǵyn buzyp otyrǵany" aitylǵan. Komitet jalpy somasy 444 434 teńge bolatyn bilet satyp alǵan 20 adamnan shaǵym túskenin jetkizdi.
"Bek Air" áýe kompaniiasynyń jumysy ótken jyly jeltoqsannyń aiaǵynda Almaty áýejaiy mańynda bolǵan ushaq apatynan keiin ýaqytsha toqtatylǵan.
27 jeltoqsanda tańerteń Bek Air áýe kompaniiasynyń Fokker-100 jolaýshy ushaǵy Almaty áýejaiynan áýege kóterile bere apatqa ushyrap, sol mańdaǵy úige soǵylǵan. Ushaqta 93 jolaýshy jáne ekipajdyń bes múshesi bolǵan. Apat saldarynan 12 adam qaza taýyp, ondaǵan jolaýshy aýrýhanaǵa túsken. Ushaq soǵylǵan úidiń jańadan salynyp jatqany, apat kezinde úidiń ishinde adam bolmaǵany habarlanǵan. Qazir tergeý amaldary jalǵasyp jatyr.
