QR Ulttyq ekonomika ministri Álibek Qýantyrov Úkimet otyrysynan keiin BAQ ókilderine bergen suhbatynda Ýkrainadaǵy jaǵdaidyń Qazaqstandaǵy infliatsiiaǵa qalai áser etetinin aitty, dep habarlaidy QazAqparat.
«Qazir bizde infliatsiia dálizi 5-7 paiyzdyń shamasynda bolsa, taǵy 1-2 paiyzǵa kóteriletin shyǵar. Biz aityp otyrǵan negativti stsenarii boiynsha odan da úlken bolýy múmkin. Qazir naqty birdeńe aitýǵa erte. Óitkeni jaǵdai ne kúrt nasharlaýy múmkin, ne kúrt jaqsarýy múmkin. Bul qazir eki el arasynda ótip jatqan kelissózderge bailanysty. Ýkraina-Resei ainalasyndaǵy jaǵdai qanshalyq uzaqqa sozylsa, ekonomikaǵa áseri de sonshalyq kúshti bolady. Iaǵni, problema neǵurlym tez sheshilse, óńirdegi elder de soǵurlym az zardap shekkeli tur», - degen ministr óńirdegi geosaiasi ahýal jyljymaityn múlik baǵasyna da áser etýi múmkin ekenin málim etti.
«Teńge álsiregen kezde jyljymaityn múlik naryǵynda keibir qurylys materialdarynyń baǵasyna qysym túsedi. Qýanyshqa orai, qazir materialdardyń kóbin ózimizde óndiremiz. Tipti keibir kórsetkishter boiynsha 80 nemese 100 paiyz almastyrýǵa qol jetkizdik. Keramika, shyny siiaqty buryn múlde Qazaqstanda óndirilmegen taýarlar boiynsha 1-2 zaýyt salý arqyly-aq importty 100 paiyz almastyrýǵa qol jetkizip jatyrmyz», - dedi Álibek Qýantyrov.
