Almaty fontanynda toq soqqan balalardy qutqarǵan Sátbaev atyndaǵy Qazaq ulttyq tehnikalyq zertteý ýniversitetiniń 2-kýrs stýdenti Abylai Balapanov QR Tótenshe jaǵdailar ministri Iýrii Ilinniń buiryǵymen «Tótenshe jaǵdaidaǵy erligi úshin» tósbelgisimen marapattaldy, dep habarlaidy "Ult aqparat".
Marapatty QR Tótenshe jaǵdailar birinshi vitse-ministri Ibragim Kúlshimbaev tabystady.
«Tótenshe jaǵdailar ministriniń atynan sizge belsendi azamattyq ustanymyńyz úshin rizashylyǵymdy bildiremin! Siz – búgingi kúnniń batyry ataǵyna laiyqtysyz. Syn saǵatta ekiniń biri siz siiaqty adam ómirin saqtaýmen qatar, óz ómirin qaýipke tigip, jedel sheshim qabyldai almaityn edi», - dedi birinshi vitse-ministr.
Eske sala keteiik, Almatyda 19 maýsym kúni Abylai sýburqaqtyń janyndaǵy oryndyqta kitap oqyp otyrǵan bolatyn. Aiǵai-shý men kómek suraǵan daýystardy estigen jas jigit fontan ishinde toq uryp jatqan adamdardy kórdi. Óz ómiri men densaýlyǵyna qaýip tóngenine qaramastan, Abylai esh oilanbastan adamdardy qutqarýǵa kirisken. Onyń aitýynsha, eki adamdy qutqarý kezinde ózin de elektr toǵy qatty soqqan. Stýdent óz-ózine kelip esin jiǵansha, sol mańda kezdeisoq bolǵan 40-45 jastaǵy belgisiz er adam taǵy bir qyzdy qutqaryp qalǵan.
Sý burqaqta oryn alǵan oqys jaǵdaida zardap shekkenderge reanimatsiialyq sharalar jasaý úshin (júrekke janama massaj jáne jasandy tynys alý) oqiǵa ornynda bolǵan qalanyń janashyr turǵyndary da atsalysyp, kómek bergen.
Abylai Balapanov pen aty-jóni belgisiz er adamnyń, sondai-aq oqiǵa ornynda bolǵan qaiyrymdy jandardyń batyl áreketiniń arqasynda úsh adamnyń ómiri qutqaryldy.
