Tótenshe jaǵdailar ministri Iýrii Ilin ózenderdiń tasýy saldarynan sý basý qaýpi bar aimaqtardy atady, dep habarlaidy Sputnik Qazaqstan.
Resmi málimetke sáikes, búginde Aqmola (Esil ózeni, Sergeev sý qoimasyna deiin), Aqtóbe (Ilek), Qaraǵandy (Nura) Batys Qazaqstan (Chija-2, Derkól, Shaǵan) jáne Qostanai oblystarynda (Tobyl jáne Aiat ózenderi) ortasha kópjyldyq mándermen salystyrǵanda ylǵal qory kóleminiń artýy tirkelgen.
"Máselen, Aqmola men Soltústik Qazaqstan oblystarynda Esil ózeni boiynda sý basý qaýpi bar. Sebebi ol jerde kóp qar jatyr", - dedi Ilin ortalyq kommýnikatsiialar qyzmetinde ótken onlain brifingte.
Ministrdiń aitýynsha, Aqmola, Aqtóbe, Shyǵys Qazaqstan, Batys Qazaqstan, Qaraǵandy, Qostanai, Pavlodar jáne Soltústik Qazaqstan oblystarynyń aýmaǵynda bir aptanyń ishinde aýa temperatýrasy kóteriledi degen boljam bar.
Sonyń saldarynan qar erý men seń júrýi múmkin. Osy óńirlerde 157 eldi mekendi sý basý qaýpi saqtalyp otyr.
"Sonymen qatar, Túrkistan oblysynyń ońtústiginde jáne taýly, taý bókteri aýdandarynda, Jambyl oblysynyń soltústik-shyǵysynda, ońtústiginde, taýly jáne taý bókteri aýdandarynda, Almaty oblysynyń ońtústiginde jáne taýly aýdandarynda jańbyr men qar túrindegi qatty jaýyn-shashyn túsedi degen boljam bar. Osyǵan bailanysty joǵaryda atalǵan óńirlerdiń taý bókteri aýdandarynda kólbeý aǵyn men taý ózenderi boiynsha sý tasqyny qalyptasady, sondai-aq. qar kóshkininiń ózdiginen túsýine sebep bolýy múmkin", - dep atap kórsetti Ilin.
Qazgidromettiń naýryzdyń úshinshi onkúndigine arnalǵan naqtylanǵan aptalyq gidrologiialyq boljamyna sáikes, respýblika aýmaǵynda aýa raiy turaqsyz, qatty jaýyn-shashyn, 23-28 m/s deiingi ekpindi jel kútiledi.
