Búgin Ortalyq kommýnikatsiialar qyzmetindegi brifingte QR Eńbek jáne halyqty áleýmettik qorǵaý ministri Birjan Nurymbetov 42 500 teńge áleýmettik tólemdi tóleý nelikten keshiktirip jatqanyn túsindirdi, dep habarlaidy QazAqparat.
«Áleýmettik tólemder nege keshigip jatyr degen suraqtar týyndaýda. «Men bir apta buryn bergenmin», «4-5 kún ótip ketti» degender kóp. Bul rette men sizderdiń aldaryńyzda ministr retinde keshirim suraimyn. Biz osy kúnderi úlgermedik. Onyń sebebi bar. Ne sebep, nelikten úlgermei jatyrsyzdar? deisizder. Onyń birneshe sebebin túsindirip keteiin. Birinshiden, biz ózimizge 3 kún belgiledik. Biraq, odan da kóbirek ýaqyt qajet edi. 42 500 teńge biýdjetten emes, memlekettik saqtandyrý qorynan tólenedi. Sol qor aqsha beredi, sol qor taǵaiyndaidy. Ol bólek mekeme», -dedi Birjan Nurymbetov.
Onyń aitýynsha, elimizde búkil tólemder «Azamattarǵa arnalǵan úkimet» korporatsiiasy arqyly bankterge jiberiledi. Al bankter azamattardyń esepshottaryna aýdarady.
«Al ótinishti qabyldap jatqan bizdiń ministrlik bolǵandyqtan barlyq qurylymdarymen olardy tekseredi. Sodan keiin sizderge jiberemiz. Osy úsh mekeme ainalysyp jatyr. Basqasha bolmaidy. Sizderge aitarym, osy úsh mekemeniń azamattary kúni-túni jumys istep jatyr», - dedi ministr.
