Bilim berý uiymdaryn jyly dárethanalarmen qamtýdy usaq másele dep qaraýǵa bolmaidy. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Jalpy aýqymdy jumys júrgizildi. Bizge «bul ministrlik deńgeiinde qaraityn másele emes» degen pikirler jetip jatyr. Biraq, balalardyń qaýipsizdigine, densaýlyǵyna bailanysty másele bolǵannan keiin muny usaq jait dep qaraýǵa bolmaidy. Óte mańyzdy másele. Aldyńǵy jyly Taraz qalasynda oryn alǵan oqiǵa áli de esterińizde bolýy kerek. Sondyqtan bizge bul máseleni sheshý boiynsha 10 ai buryn Memleket basshysynyń tapsyrmasy bolǵan. Qazir ózderińiz kórip otyrsyzdar, buǵan deiin 2 700 mekteptiń sanitarlyq-gigienalyq qajettilikteri bolmasa, búginde 2 456 mektepte jyly dárethanalar salynyp, paidalanýǵa berilip otyr. Qalǵany - 245. Onyń 195-i qazir salynýda, qalǵan 50-i boiynsha da jumys bastalypty», - dedi Ashat Aimaǵambetov ministrliktiń apparat keńesi barysynda.
Sonymen qatar ministr jyly dárethanalardyń jumys istep turýy, odan keiin bólek kabinalardyń bolýy, sýmen qamtamasyz etilýi, basqa da máseleler sheshilýi kerektigin basa aitty.
«Dáretahanany salǵanymen, ony jaýyp qoiyp, daladaǵy dárethanaǵa baryp júretindei jaǵdaiǵa jol bermeýimiz kerek. Ondai jaittar da kezdesip turady, jasyratyny joq. Ony aldyńǵy jyly kórdik. Sondyqtan úlken jumys júrgizildi deýge bolady. Degenmen óńirler boiynsha jyldyń sońyna deiin júrgiziletin jumys kórsetildi. Bilim basqarmalarynyń basshylary osyny basty baqylaýǵa alýy kerek. Jeltoqsanda bul máseleni qaita qaraimyz», - dedi ol.
Aita keterligi, apparat keńesi barysynda QR Bilim jáne ǵylym ministrligi Bilim jáne ǵylym salasyndaǵy baqylaý komitetiniń basshysy Gúlzat Kóbenova Atyraý, Almaty, Shyǵys Qazaqstan, Jambyl, Batys Qazaqstan, Qaraǵandy, Túrkistan oblystarynda jáne Shymkent qalasynda mektepterge jyly dárethana salý máselesi tejelip otyrǵanyn aitqan edi.
