QR Densaýlyq saqtaý ministri Eljan Birtanov elordada masa shaqqannan keiin aýrýhanaǵa júginip, ajal qushqan áieldiń ólimine qatysty pikir bildirdi, dep habarlaidy QazAqparat tilshisi.
«Birinshi qalalyq aýrýhanada kóz jumǵan áielge qatysty aitarym - bul jaǵdai meniń baqylaýymda. Qazirgi tańda naqty bir minýttyń, tipti bir sekýndtyń ishinde ne bolǵanyna deiingi aqparat qolymyzda bar. Búgingi kúni «anafilaktikalyq shok» degen aldyn ala diagnoz qoiylyp otyr. Bizdiń boljaýymyzsha, jalpy allergiialyq reaktsiianyń aiasynda barlyq dári-dármekter tolyǵymen hattamalyq diagnostika men emdeý, standart boiynsha qoldanylǵan, alaida osy kezde kúrdelelik paida bolǵan», - dedi ministr Úkimet otyrysynan keiin tilshilerdiń suraǵyna jaýap bere otyryp.
Ol óz sózinde istiń barlyq mán-jaiyn zertteý quqyq qorǵaý organdary qyzmetkerlerimen júrgiziletinin atap ótti.
«Quqyq qorǵaý organdaryna habar berildi. Olar barlyq dári-dármekterdi tárkiledi, sondyqtan bul biraz ýaqytty alady. Sebebi, toksikologiialyq saraptama júrgiziledi. Onyń qorytyndysy boiynsha ne bolǵanyn biz mindetti túrde habarlaityn bolamyz», - dedi vedomstvo basshysy.
Óz kezeginde qalalyq qoǵamdyq densaýlyq saqtaý basqarmasynyń basshysy Kamaljan Nadyrov qaitys bolǵan áielge preparat qalai berilgenin aityp berdi.
«Bul bizdiń kúndelikti ondaǵan, júzdegen patsientterge berilip jatqan preparattar. Biraq, tek saraptama qorytyndysy ǵana ólim jaǵdaiyna ne sebep bolǵanyn anyqtap beredi. Patsient aýrý men qyshýdy sezinetinin aityp shaǵymdanǵan. Osyǵan bailanysty oǵan ketonal berilgen», - deidi Kamaljan Nadyrov.
Esterińizge sala keteiik, atalǵan áieldiń aýrýhanada kóz jumǵany týraly onyń qurbysy Feisbýktegi paraqshasynda jazǵan bolatyn. Onyń atap ótýinshe, 28 jastaǵy Maqpal Espenbetova elordadaǵy birinshi qalalyq aýrýhananyń kómegine júgingen.
