QR Indýstriia jáne infraqurylymdyq damý ministri Qaiyrbek Óskenbaev qurylys naryǵyndaǵy suranys pen usynystyń teńgerimin qalai retteitinin túsindirdi, dep habarlaidy QazAqparat.
«Ókinishke qarai, qoldanystaǵy memlekettik satyp alý júiesi boiynsha biz kez kelgen qatysýshyny qandai da bir konkýrsqa qatysýǵa jiberýden bas tarta almaimyz. Mysaly iri kompaniia Aqtaýdaǵy jol qurylysynyń konkýrsyn jeńip alady. Biraq olardyń sol jaqqa kúsh jumyldyryp jatqanyn kóre bermeimiz. Iaǵni, osy jaqtan búkil tehnikasyn aparyp áýre bolmaidy. Sol jerdegi tehnikany, adamdardy jaldai bastaidy. Sondyqtan jergilikti qurysshylarǵa áldeqaida teń múmkindik berý úshin «Eger iri nysannyń tenderine qatyssań, sol jerde óz tehnikań men adamdaryń bolsyn» degen talap qoimaqshymyz. Biz osyndai jolmen júremiz. Iaǵni, bireýdi sózben kóndireiik dep otyrǵan joqpyz. Monopolizatsiiaǵa jol bermeý úshin jáne bireýlerdiń naryqta ústemdik etýin boldyrmaý úshin júieli sharalar qabyldaimyz», - dedi Qaiyrbek Óskenbaev.
Sondai-aq, ol biyl baspana naryǵyna byltyrǵydai investitsiia bolmaýy múmkin ekenin aitty.
«Byltyr zeinetaqy jinaǵyndaǵy shekti mólsherden artylǵan somany baspana máselesine jumsaýǵa ruqsat berilgen kezde bir mezette naryqqa aqsha quiyldy. Biyl ondai bolmaidy. Biz jyl saiyn shamamen 2 mln sharshy metr baspana ósimin qamtamasyz etip kelemiz. Biraq qurylys indýstriiasy bul qarqynǵa ilese almai jatyr. Injenerlik kommýnikatsiia da úlgermei jatyr. Óitkeni jylý, energiia jelilerin keńeitý úshin qosymsha ýaqyt kerek. Olar bir jyldyń ishinde qýatty 20-30 paiyz kótere almaidy. Sondyqtan Memleket basshysy qurylys indýstriiasy men infraqurylymnyń qolyndaǵy qýatty qazirgi kólemmen teńestirip alý týraly mindet qoidy. Qazir taldaý júrgizip jatyrmyz. Qurylys naryǵyn sál-pál sabasyna túsiretin shyǵarmyz», - dedi ministr.
