Densaýlyq saqtaý ministri Eljan Birtanov dárigerler qaraǵandylyq qoryqshyny qutqarý úshin bar kúshin salǵanyn málimdedi, dep habarlaidy Sputnik Qazaqstan tilshisi.
Jýrnalister ministrden qaiǵyly oqiǵa bolǵan kúni tikushaq jiberý shynymen múmkin bolmady ma dep surady.
"Búgingi tehnikalyq múmkindikterge qaraǵanda, túnde jáne aýa raiyna qarai ushýǵa bailanysty qiyndyqtar bolady. Eń aldymen, qaýipsizdik máselesi. Ókinishke qarai, ózimizdiń tarihymyzda tikushaq jiberip, dárigerler men naýqastan aiyrylyp qalǵan qaiǵyly jaǵdai bar", — dedi ol kýlýarda.
Birtanov mundai jaǵdaida jergilikti jedel járdem stansalary tartylatynyn atap ótti.
"Naýqastardy aýdandyq aýrýhanada kútken edik. Brigada habar berildi. Alaida olar tikelei qalaǵa júrip ketýdi jón kórgen. Tiisinshe, ýaqyt joǵaltyp aldy. Biz qaladan kólik jiberip, qalaǵa kirer jolda kútip aldyq", — dep túsindirdi ministr.
Osy kezde BAQ ókilderi Birtanovtan dárigerler qansha ýaqyt joǵaltqanyn surady.
"Menińshe, osynsha saǵat joǵalttyq dep aitýǵa bolmaidy. Qaiǵyly oqiǵa aidalada bolǵannan keiin, tikelei jetkizýge tehnikalyq múmkindik bolǵan joq", — dedi ol.
Al reanimobil jibersek, odan da kóp ýaqyt óter edi deidi ol.
"Mundai jaǵdaida ýaqyt joǵaltpas úshin óz kúshimen jetkize bastaǵany durys bolǵan shyǵar. Onyń ústine, oqiǵa aidalada boldy. Bizde dalada aýrýhana joq, aýdandyq aýrýhanalar bar", — dedi Birtanov.
Ministr naýqastyń jaraqaty aýyr bolǵanyn, dárigerler qutqarýǵa bar kúshin salǵanyn aitty.
"Barlyq qyzmet qoldarynan kelgenin aianyp qalmady. Biz barlyq múmkindikti paidalanyp, naýqasty qutqarýǵa kúsh saldyq. Ókinishke qarai, patsient kóz jumdy", — dep túiindedi vedomstvo basshysy.
Eske sala ketsek, 13 qańtarda Qaraǵandy oblysy aýmaǵynda inspektorlarǵa brakonerler shabýyl jasady. Inspektorlar kúdik týǵyzǵan avtokólik pen qujattardy teksergeli jatqanda, brakonerler qarsylyq kórsetken. Saldarynan "Ohotzoopromnyń" eki inspektory aýyr jaraqattanyp, biri elordalyq aýrýhanada kóz jumdy. Keshe qylmysqa qatysy bar úsh er adam ustaldy.
