Aýyl sharýashylyǵy ministri Erbol Qarashókeev Qazaqstanda kókónis baǵasyna qatysty suraqqa jaýap berdi, - dep habarlaidy Tengrinews.kz agenttigi.
"Kókónistiń jaǵdaiy turaqty. Dúkenge baryp baǵalaryn kórińizder, kartop 130-140 teńge turady. Mundai jaǵdai buryn-sońdy bolmaǵan. Biyl kókónisti 4,2 million tonnadan 4,9 million tonnaǵa deiin ósirdik. Biz kartopqa, sábizge, qyryqqabatqa degen suranysymyzdy tolyǵymen ótedik", - dedi Qarashókeev.
Sondai-aq, ol qiiar men qyzanaqtyń qymbattaýyna qatysty pikir bildirdi.
"Qiiar men qyzanaqtyń baǵasyna keletin bolsaq, bul jyl saiyn bolatyn úrdis, birinshi jyl emes. Qazan-qarashada ekeýiniń de maýsymy aiaqtalatyndyqtan, jylyjailarda ósirile bastaidy. Ol jazdaǵyǵa qaraǵanda qymbatyraq bolady", - dep qosty ministr.
Sondyqtan Aýyl sharýashylyǵy ministrligi basshysynyń aitýynsha, vedomstvonyń basty jospary eldegi jylyjai kólemin ulǵaitý.
"Bul jerdegi eń basty maqsat - óndiris kólemin ulǵaitý. Ol úshin barlyq qajetti sharalar qarastyrylyp jatyr", - dep túsindirdi ministr.
Qarashókeevke Qazaqstanda qys mezgiline kókónis jetkilikti me degen suraq qoiyldy.
"Árine, bizde shamamen 4 million tonna kartop bar, onyń 2 million tonnasyn uiymdasqan sharýa qojalyqtary, jartysyn jeke sharýa qojalyqtary qamtamasyz etti. Aýyldardyń jartysy ózin-ózi qamtamasyz etip jatyr", - dep túiindedi ol.
